لژێر دروشمێ ( زمانێ مە ناسناما مەیە ) ئەڤرو دووشمبی 20.05.2024 ب سەرپەرشتی و ئامادەکرنا رەڤەندا کوردستانی لباژێرێ ( ڤۆلفسبۆرگ – Wolfsburg ) و ب بەشداریا شاندێ فەدەراسیۆنا کۆمەلێن کوردستانی ل ئەلمانیا بسەروکاتیا کاک نادر دۆغاتی و کاک دلبرین شنگالی بەرپرسێ بەشێ راگەهاندنێ و نوێنەرێن سازیێن کوردستانی و ئەلمانی و کەسایەتیێن کوردستانی و جەماوەرەکێ مەزن ژ رەڤەندا کوردستانی لباژێرێ ڤۆلفسبۆرگ ، سیمینارەک ژ بۆ بەڕێز دکتۆر فەریاد فازیل عومەر زمانزان ، مێژووناس ، ئەکادەمیک و سەرۆکێ ئینستیتوتا خوەندنا کوردی لبەرلین – ئەلمانیا لسەر دیرۆکا کوردی و مێژوویا زمانێ کوردی هاتە لدارخستن تێدە دکتۆر فەریاد فازیل تیشک بەردا سەر گرنگیا زمانێ کوردی و قۆناغێن خۆراگریا گەلێ کورد بدرێژیا مێژوویێ ژ بۆ پاراستنا زمان ، چاند ، فەرهەنگ و کولتورا مە وەکە ئەرکەکێ نەتەوەیی و نیشتیمانی ، هەروەها تەکەزی لسەر گرنگیا زمانێ دایک لدیاسپۆرا کر و گۆت : ژ بۆ کو ئەم بەردەوامیێ بدەینە زمانێ خو و وی بپارێزین ژ مەترسیا نەمانێ گرنگە ئەم کورد لدیاسپۆرا بزمانێ خو بئاخڤین داکو نفشێن مە بخاک و نەتەوە و نیشتیمانێ خو بێنە گرێدان و لێ ببن خوەدی .
هەر بڤێ هەلکەفتنێ رێزدار دۆغاتی ژی د کورتە پەیڤەکێدا دەستخۆشی ل دەستەیا رێڤەبەریا رەڤەندا کوردستانی ل باژارێ ڤۆلفسبۆرک کر ژ بۆ ڤی ئەرکێ وان یێ پیرۆز و خۆشاهاتنا دکتۆر فەریاد فازیل کر و ڕۆلێ وی یێ نەتەوەیی بلند نرخاند و خەباتا وی ژ بۆ خزمەتا جڤاکێ خو یێ کوردستانی لوەلاتێ کۆچبەریێ، لدویفدا بەرپرسێ ناڤەندا رەڤەندا کوردستانی لناوچا هانۆڤەر کاک سالار کەرکوکی د پەیڤا خودا سوپاسیا دکتۆر فەریاد فازیل کر ژ بۆ هاتنا وی و خەباتا وی وەکە زمانزان ، مێژووناس و ئەکادەمیکەکی کورد ژ بۆ خزمەتا کورد و کوردستانێ بلند نرخاند .
هەژیە بێژین کو ژمارەکا مەزن ژ کتێبا فەرهەنگا کوردی – ئەلمانی ژ بەرهەمێن دکتۆر فەریاد فازیل عومەر وەکە دیاریا جەنابێ سەرۆکێ هەرێما کوردستانێ کاک نێچیرڤان بارزانی ژ بۆ رەڤەندا مە یا کوردستانی هاتە پێشکێشکرن .
لدوماهیێ دکتۆر فەریاد فازیل عومەر ژ لایێ فەدەراسیۆنێ و ناڤەندا رەڤەندا کوردی ل هانۆڤەر ب ئالا کوردستانی و خەلاتا رێزگرتنێ هاتە خەلاتکرن و داخوازیا تەمەنەکێ درێژ و سەرکەفتنێ ژ بۆ وی کرن .
فەدەراسیۆنا کۆمەلێن کوردستانی ل ئەلمانیا
Kurdischer Rat in Deutschland r.V.
20.05.2024
نڤیسین: دلبرین شنگالی
