کچێکی تەمەن 18 ساڵی خەڵکی پاوە، سزای بەندکران و هەروەها سێ ساڵ بێبەش بوون لە مافی چوونە دەرەوەی وڵاتی بە سەردا سەپێندرا.
بە گوێرەی هەواڵێکی رێکخراوی مافی مرۆڤی هەنگاو، لە ڕۆژانی ڕابردوودا، ڕویا محیەدینی تەمەن 18 ساڵ و خەڵکی پاوە، لەلایەن دادگای شۆڕشی شارەکەوە، سزای یەک ساڵ بەندکران و هەروەها بێبەشبوون لە مافی چوونە دەرەوەی وڵاتی بۆ ماوەی سێ ساڵ بە سەردا سەپێندراوە.
بە گوتەی سەرچاوەیەکی ئاگادار و نزیک لە بنەماڵەی محیەدینی، ئەو سزایە بە سەرۆکایەتی دادوەر یەعقووب حەبیبی شەمس و، بە تۆمەتی ئەندامێتی حیزبی دیموکراتی کوردستان، حدک بە سەر ناوبراودا سەپێندراوە.
رێکخراوەکە پشتڕاستی دەکاتەوە، کە پڕۆسەی پێڕاگەیشتنی دادوەری لە دۆسیەی ڕۆیا محیەدینی، بە بێ ڕەچاوکردنی لانی کەمی مافەکانی تۆمەتبارێک بووە و، تەنانەت مافی هەبوونی پارێزەریشی نەبووە.
بە گوێرەی زانیارییەکان ڕویا محیەدینی، هاوینی ڕابردوو دوای پێنج مانگ ئەندامێتی لە حیزبی دیموکراتی کوردستان، لەو حیزبە جیا بووەتەوە و گەڕاوەتەوە بۆ زێدی خۆی و، لەسەر سنووری پاوە، لەلایەن هێزە ئەمنییەکانەوە دەستبەسەر کراوە و، بۆ ماوەی یەک هەفتە، هەموو ڕۆژێک خۆی بە ئیدارەی ئیتڵاعاتی ئەو شارە پێشانداوە
