کۆنفیدراسیۆنی ڕەوەندی کوردستانی پەیامێکی لەسەر بڕیاری دادگای باڵا بڵاو دەکاتەوە
سەبارەت بە بڕیارەکەی دادگای باڵای فیدراڵی عێراق لەسەر پرسی نەوتی هەرێمی کوردستان، کۆنفیدراسیۆنی ڕەوەندی کوردستانی، پەیامێکیان ئاڕاستەی رای جیهانی و رێکخراوە دیموکراتییەکان کرد، کە تێیدا هاتووە، بڕیارە کتوپڕەکەی دادگاکە، بڕیارێکی نادەستووری و دەستی دەرەکی بووە، هاوکات دووپاتی دەکەنەوە، هەر گرژییەک لەسەر ئەو پرسە درووست بێت، ئەوا سەرجەم ناوچەکەش دەگرێتەوە.
دەقی پەیامەکە:
بۆ ڕای جیهانی و ڕێکخراوە دیموکراتییەکان
دادگای باڵای فیدراڵی عێراق، لە بڕیارێكی كتوپڕ و چاوەڕوان نەكراودا، ڕایگەیاند کە هەناردەكردنی نەوتی هەرێمی كوردستان ”نادەستوورییە” و، تەنیا حکوومەتی بەغدا ئەو مافەی هەیە و، دەبێت هەموو نەوتی ناوچە کوردییەکانی هەرێمی کوردستانی عێراق کۆنترۆڵ بکات، ئەم بڕیارە بە تەواوی سیاسییە و سەرچاوەی لەو سیاسەتانە وەرگرتووە، کە ڕژێمەکانی پێشوو لە عێراق دەیان ساڵ بە کارییان هێناوه.
ئەم بڕیارە دەبێتە هۆی نائارامی زیاتر لە ناوچەکەدا و، ناسەقامگیری و هەڕەشە لێکردن، بڕیارەکە سیاسییە و پێچەوانەی دەستووری فیدراڵییە لە عێراقدا، پێویستە هەموو ناکۆکییەکان بە گوێرەی دەستووری عێراقی فیدراڵ بە دیالۆگی نێوان حکوومەتی بەغدا و حکوومەتی هەرێمی کوردستان چارە بکرێن، حوکمی تاک لایەن لە ژێر هەژموونی دەرەكی دژی بەرژەوەندییەكانی گەلی عێراقە بە گشتی.
حکوومەتی هەرێمی کوردستان، لە مێژە نەوتی خۆی بە بازاڕی جیهانی دەفرۆشێت و داھاتەکەشی بۆ پەرەپێدانی ژێرخانی ئابووری و مووچە و پێداویستیە داراییەکانی ھەرێم و، خزمەتگوزارییەکان و هتد بە کاردەھێنێت.
بڕیارەکە “نادادپەروەرانە و نادەستوورییە” و، ململانێکە تەنیا لە ڕێگەی دیالۆگەوە چارە دەکرێت.
بە گوێرەی ئەو ڕێککەوتنەی كە حكوومەتی ھەرێم لەگەڵ حکوومەتی ناوەنددا کردوویەتی، هەر ئێستا ڕۆژانە 250 هەزار بەرمیل نەوت لە بەرامبەر ئەو بودجەی ھەرێم ڕادەستی حکوومەتی بەغدا دەکرێت.
سەقامگیری نەک تەنیا لە عێراق و کوردستان، بەڵکو لە سەرتاسەری ناوچەکەدا دەکەوێتە ژێر ھەڕەشەوە، بۆیە وەک کۆنفیدراسیۆنی ڕەوەندی کوردستانی، ئیدانەی بڕیاری سیاسی دادگای فیدراڵی عێراق دەکەین.
کۆنفیدراسیۆنی ڕەوەندی کوردستانی
2022-02-16
