هاووڵاتییەکی کورد، کە خەریکی ئامادەکردنی رێورەسمی تایبەت بە جەژنی نەورۆز بووە، دوای بانگکرانی بۆ ئیتلاعاتی سوپا دەستبەسەر دەکرێت.
بە گوێرەی هەواڵی ڕێکخراوی مافی مرۆڤی کوردستان، دوێنێ شەممە19ی مانگ، بورهان درەخشانی تەمەن 32 ساڵ و خەڵکی شارەدێی (نێ)ی سەر بە مەریوان، دوای بانگ کران بۆ ئیتڵاعاتی سوپای ئەو شارە، دەستبەسەر کراوە.
بە گوتەی سەرچاوەیەکی ئاگادار و نزیک لە بنەماڵەی درەخشانی، بورهان درەخشانی لە پەیوەندی لەگەڵ ڕێوڕەسمەکانی نەورۆز و هەوڵەکانی سوپای پاسداران بە مەبەستی ڕێگری کردن لە بەرێوەچوونی ڕێوڕەسمی نەورۆزی گوندی نێ، دەستبەسەر کراوە و چارەنووسی نادیارە.
لە هەفتەی ڕابردوودا، نزیکەی 70 هاووڵاتی خەڵکی شارەدێی (نێ) لەلایەن ناوەندە ئەمنییەکانەوە بانگ کراون و هەڕەشەیان لێ کراوە، کە نابێت بەشداری ڕێوڕەسمەکانی تایبەت بە نەورۆز بکەن.
