به‌ریتانیا..
ژماره‌ی كۆچبه‌رانی نایاسایی له ساڵی 2022 دا بۆ به‌ریتانیا، حه‌وت هه‌زاری تێپه‌ڕاندووه و، حكوومه‌تی ئه‌و وڵاته‌ش ده‌ڵێت، ناردنی كۆچبه‌ر و په‌نابه‌ران بۆ رواندا، چه‌ند مانگێك دواده‌كه‌وێت.
به‌پێی هه‌واڵێكی ئاژانسی پی ئه‌ی میدیا، ژماره‌ی ئه‌و په‌نابه‌ر و كۆچبه‌رانه‌ی له سه‌ره‌تای ساڵی 2022ه‌وه تا ئێستا، له‌رێگه‌ی ده‌ریای مانشه‌وه به به‌له‌م یان یه‌ختی بچوك خۆیان گه‌یاندووه‌ته كه‌ناراوه‌كانی به‌ریتانیا، به‌رزبووه‌ته‌وه بۆ حه‌وت هه‌زار و 240 كه‌س.
ئه‌مه له‌كاتێكدا، له هه‌مان ماوه‌ی ساڵی 2021دا ژماره‌كه دوو هه‌زار و 390 كه‌س و له ساڵی 2020یشدا ته‌نیا هه‌زار و شه‌ش كۆچبه‌ر بوون.هاوكات وته‌بێژی سه‌رۆكوه‌زیرانی به‌ریتانیا، ئاماژه‌ی به‌وه كردووه جێبه‌جێكردنی پلانی حكوومه‌ت بۆ ناردنی په‌نابه‌ران بۆ رواندا، به‌هۆی ئاسته‌نگه یاساییه‌كانه‌وه، ره‌نگه زۆرتری پێ بچێت و ماوه‌ی چه‌ند مانگێكی بوێت.
پێشتریش نوێنه‌ری حكومه‌تی هه‌رێمی كوردستان له به‌ریتانیا ڕایگه‌یاندبوو، جێبه‌جێكردنی ئه‌و بڕیاره ئاسان نیه.
