کۆنفدراسیۆنی ڕەوەندی کوردستانی، بەبۆنەی کۆڕەوە ملیۆنییەکەی گەلی کوردستان لە باشوور، پەیامێکیان بڵاوکردەوە، کە تێیدا دەڵێن، بەو ئومێدەین چیدی ئەو ڕۆژگارانە دووبارە نەبنەوە و، ئەم یادانەش وەک ھێزێک بۆ نەوەکانی داھاتوو و سوربوون لەسەر بەدەست ھێنانی مافە نەتەوەییەکانی گەلی کورد.
دەقی پەیامەکە:
ھێندەی نەبرد دوای ڕاپەڕینی بەھاری ساڵی 1991 و، لە کۆتایی مانگی ئادار بۆ سەرەتای مانگی نیسان، کۆڕەو و کۆچی ملیۆنی بەرۆکی کوردی گرتەوە، ئەو خۆشی و سەرکەوتنانەی ھێزی پێشمەرگە لە کەرکوک و تەواوی ناوچە کوردستانییەکان درێژەی نەبوو، کۆتاییەکەی بە گەڕانەوەی ڕژێمی بەعس و ھێرشێکی بەرفراوان، لە تۆڵەی ئەو سەرکەوتنانەی ھێزی پێشمەرگە و گەل بوو.
خەڵکی کوردستان بەتێکڕا ھەژمون و دەستەڵاتی بەعسی شۆڤێنی ڕەتکردەوە و، بڕیاری ئەو کۆڕەوە مەزنە درا، خەڵکی ھەرێمی کوردستان ڕوویان کردە ناوچە سنوورییەکان و، بەشێکی زۆری خەڵک لەسەر سنوورەکانی ئێران و تورکیا خۆیان گرتەوە.
سەرماو سۆڵە و باران و برسیەتی و ترس، لەو سنوورانە بەکۆڵی ئەو خەڵکەوە بوو، دونیا لەو کارەساتەی دەڕوانی و چاوی کامێراکان و ڕاگەیاندنەکان، مامەڵە و ڕەفتاری پاسەوانانی سنوور لە ئێران و تورکیای نیشاندەدا.
کورد لەسەردەمی ڕابردوودا تەواوی ژیانی لە ئاوارەیی و ڕاکردن و ژیانی ژێر خێمە و، لە ئۆردوگاکان بەسەربردووە و، دوژمنان ڕێگایاننەداوە وەک ھاوڵاتیەکی ئاسایی، سادەترین مافەکانی وەک مرۆڤ دەستەبەربن و، ژیانێکی ئاسوودە و ئارام بژی .
نەیارەکانی کورد، ھەمیشە ویستویانە ھاونیشتمانی کورد لە گێژاو و ئاڵۆزیدا بژی، ماوەی ئەوەی نەبێ بیر لە ژیان و گوزەران و ئایندە و پرسی نەتەوەیی خۆی بکاتەوە، بۆیە ھەمیشە کۆڕەو و کۆچ لە کورد نەبڕاوە، جا ملیۆنی بێت، یا کەمتر، ھەمیشە کۆچ و کۆڕەو ھاوەڵی تاکی کورد بووە.
لەم یادەدا بەو ئومێدەین چیدی ئەو ڕۆژگارانە دووبارە نەبنەوە و، ئەم یادانەش وەک ھێزێک بۆ نەوەکانی داھاتوو و سوربوون لەسەر بەدەست ھێنانی مافە نەتەوەییەکانی گەلی کورد و، کۆتایی ھێنان بە ژیانی ئاوارەیی و کۆچ و کۆڕەو بێت، تا ئێمەی کورد وەک ھەر نەتەوەیەکی دی ژیانێکی ئارام و ئاسوودە و شایستەمان ھەبێت.
بژی کورد بژی کوردستان
کۆنفدراسیۆنی ڕەوەندی کوردستانی
01.04.2023
