جانکورد
– ١٩٨٦
دەخسینا دلێ من ژ ڤان تڤیرکانە
وەلاتێ وان لپشتا وانە
… و ژیانا وان گەریانە
دەرباس دبن تخووبێن دوور
و سینۆر د زمانێ وان دە نەھانە….
دەخسینا دلێ من ژ ڤان زارۆکانە
ئەڤ ئێن کۆ ب رۆژ دلیزن،
دبەزن…
دمیزن…
و د خەونێ دە لیستکان دبينن
ھێڤیێن مەزن ژ خوە رە دچینن
… و نزانن کۆ با تژی ژەھرە
ئاڤ تژی ژەھرە
و پیڤازا کۆ ئەم ژ ئەنکوورێ ھلدکن
و ھەر تشتەکێ کۆ ئەم دخون…
دەخسینا دلێ من ژ ماسیێن دەریانە
و ژ ڤان ترێنانە
ئەڤێن کۆ د شەڤا رەش دە
دبەزن د رێ دە
دەرباس دبن تخووبێن وەلاتێ من
و ھین وێ دە…
تەنێ خوە روودنم
د بێدەنگیا شەڤێ دە
وەکە مەلا یێ د نمێژا سبێ دە
و دۆستان د بیرا خوە دە
یەک بیەک دژمێرم
لدەریێ مالێ دنێرم،
و گوھ ددێرم،
کۆ یەک ژ وان بێ
د ڤێ تەناھیێ دە…
غەریبیێ!
تە ھەستیێ من ھێرا
ئەزێ گلیێد خوە بکم
لێ ژ کێ رە… ژ کێ رە
دەخسینا دلێ من ژ ڤان ھونەرمەندانە
کەلا دلێ خوە درێژن
و ھەسرەتێن خوە دبێژن
و ژیانا وان عەشق و سترانە
غەریبیێ!
تە ئەز گرتم بداڤا
وەکە مرۆڤێ کوور ژ ھەردو چاڤا
تە لنگێد من خستن کەمەندا
و ب سەر دە ئانی لەھیا ڤان دەردا…
غەریبیێ!
ئەزێ خوە ئازاکم ژ ڤان کۆلەتیا
و ژ ڤان دەردا…
ئەزێ خانیەکی خوە ل گوندێ مە ئاڤا بکم
و بیرانینێد خوە ژ رازانێ راکم
ئەزێ دڤیتێ خوە باڤێژم
و ڤان دلۆپێن خوینا دلی نارێژم
نارێژم…
