کۆنفدراسیۆنی ڕەوەندی کوردستانی، دەرئەنجام و راسپاردەکانی دیداری (سەدەیەک دوای پەیمانی لۆزان بۆچوون و دیدگاکان)، بڵاوکردەوە، تێیدا چەندین کەسایەتی سیاسی و بیرمەندی کورد و جیهان بەشداری بوون و، دید و بۆچوونی خۆیان لەسەر لێکەوتە و کاریگەییەکانی ئەو پەیماننامەیە خستەڕوو، کە لە رۆژانی 27 و 28ی5ی2023 بەڕێوەچوو.
دەقی راگەیاندراوەکە:
دەرئەنجامی کۆتایی یەكەمین دیداری کۆنفدراسيۆنی ڕەوەندی کوردستانی دەربارەی (100) ساڵەی رێککەوتنامەی لۆزان، کە لە رێککەوتی 27 و28ی5ی2023 لە شاری لۆزانی سویسرا بەڕێوەچوو.
بەڕێزانی ئامادەبوو! پانێڵێست و بەڕێوەبەرانی پانێڵەكان، كوردستانیانی ئازیز لە ناوخۆی كوردستان و لە دیاسپۆرا، خۆبەخشان و هاوكارانمان، بۆ ڕێكخستنی ئەم دیدارە ماندوو نەبن، بەوپەڕی سوپاسگوزاری و پێزانینەوە لە ئامادەبوون و بەشداریكردنتان دەڕوانین و زۆر بەرزی دەنرخێنین.
لە كۆتایی ئەم دیدارەدا، بە پێویستی دەزانین بە کورتی و پوختی چەند دەرئەنجامێك و سەرنجێك و راسپاردەیەك ڕابگەیەنین:
- یەكەمین دیداری کۆنفدراسيۆنی ڕەوەندی کوردستانی، بە قەبارەیەکی مەزن و لە دەرەوەی خاکی کوردستان، بە بەشداری و ئامادەبوونی سەدان کوردستانیان لە دەرەوە و ناوەوەی کوردستان و، دەیان دۆستی کوردستان لە شاری لۆزانی وڵاتی سویسرا، لەو شوێنەی کە
کوردستانی تێدا دابەشكرا، بە سەرکەوتوویی ئەنجامدرا.
لە دیدارەكەدا 4 پانێڵ و بە بەشداری 20 توێژەر، پسپۆڕ و شارەزا و سیاسەتمەدار، بە زمانەكانی كوردی و فەڕەنسی و ئینگلیزی، لە ڕەهەند و گۆشەنیگای جیاوازەوە هەڵسەنگاندن و خوێندنەوەیان بۆ ئاسەوارە فرەلایەنەكانی ئەم ڕێككەوتننامە شوومە، لە ماوەی 100 ساڵی
ڕابردوودا كرد.
- لەم دیدارەدا، بە شانازییەوە گوتاری جەنابی سەرۆک بارزانی، هەروەها گوتاری سەرۆکی شارەوانی لۆزان و سەرۆکی کۆنفدراسيۆن ا خوێنرانەوە، بە خۆشحاڵییەوە، بەشی هەرە زۆری پارت و لایەنە سياسییەکانی گشت پارچەکانی کوردستانیش بەشداربوون و بۆچوونی خۆیان بەوپەڕی ئازادی و گیانی نیشتمانپەروەرییەوە پێشکەشکرد، هەروەك ڕۆڵ و پێگە و جێدەستی بابەتیانەی سەركردە كوردستانییەكان لە 100 ساڵی ڕابردوودا، بەبێ جیاوازی، بە هەند و قەدر و قیمەتەوە، بەرز ڕاگیران و خەبات و ماندووبوون و قوربانیدانی ئەوان، دۆزی گەلی كوردستانی بە زیندوویی تا ئەمڕۆ هێشتووەتەوە.
- سڕينەوەی گەلی کوردستان لە دەقەکانی رێککەوتنامەکە و بە بەشداری زلهێزەکانی ئەوكاتی جیهان، نەبووە هۆی تواندنەوەی گەلی کوردستان، کەواتە رێککەوتنامەی لۆزان لەم ڕووەوە شکستی هێنا. مێژوو شاهیدە، هەرچەندە کوردستان زیاتر پارچە پارچە کرا، سەرەڕای گۆڕینی ديمۆگرافی و سیاسەتی نکوڵیکردن و سەرکوتکردن، بەڵام هەوڵ و خەبات و تێکۆشانی نەپساوەی کوردستانیان هەر بەردەوام بووە و، بۆ گشت گەلانی جیهان سەلمێنرا، کە کورد (زيندووە قەت نانەوێ ئاڵاکەمان). لە بەرامبەریشدا گرتنەبەری شێوازە جیاوازەكانی خەباتیش دژی ستەمكاری و چەوساندنەوە و بێبەش كردن، وێڕای پاراستنی هەبوون و ناسنامەی گەلی كوردستان، نەبووەتە هۆی خستنی ئەو دەوڵەتانەی كە كوردستانیان بەسەردا دابەشكراوە.
- بۆیە ئەزموونی 100 ساڵی ڕابردوو، پێویستە ببێتە مایەی وانە و جۆراوجۆر بۆ هەموو لایەك. كە تەنیا ئاشتەوایی و دیالۆگ و ڕێزگرتنی دوولایەنە ڕێگە دروستەكەیە.
- سەبارەت بە راسپاردەکانی ئەم دیدارەش، كوردستانیانی ئازیز، بەڕێزانی ئامادەبوو، پوختەی ڕاسپاردەكانی ئەم دیدارە مێژووییە، لەم چەند خاڵەدا كورت و پوخت كراونەتەوە:
- دوای سەد ساڵ لە رێککەوتنامەی لۆزان، کە واقعی سنوورە نێودەوڵەتییەکان سەپاندوویەتی بە سەرماندا، مەخابن دابەشبوونی كوردستان واقیعێكە و هەیە و كوردستان چوار بەشە. پرسی هەر پارچەیەكیش لەوی دیكەیان جیاوازە و تایبەتمەندی خۆیی هەیە و، هەر خەباتێكیش لە هەر پارچەیەك، دەبێت لە سنوور و چوارچێوەی ئەو پارچەیەدا بێت. بۆیە هەر جوڵە و هەوڵێك لە هەر پارچەیەكی كوردستان، پێویستە بە دیدێكی ژیرانە و واقیعیانەوە بێت. بە جۆرێك كە كاریگەریی و لێكەوتەی خراپی لەسەر هیچ پارچەیەكی دیكەی كوردستان نەبێت. وێڕای ئەوەی كە پێشکەوتنی دۆزی کوردستان لە هەر پارچەیەک، پێشکەوتنی پرسی کوردستانە بە شێوەیەکی گشتی.
- هەر لەو میانەیەدا، ئەزموونی هەرێمی كوردستانی عێراق، ئەزموونێكە كە خاوەنی پێگە و قەوارەی یاسایی و دەستووریی خۆیەتی. پێویستە هەموان لە خەم و مشووریی پاراستنی قەوارەكەیی و بەهێزتركردنی پێگەكەیدا بن. بە تایبەت كە ئەم قەوارەیە سەلماندوویەتی نەك مایەی هەڕەشە نییە بۆ وڵاتانی دراوسێ، بەڵكو فاكتەرێكی سەقامگیریی و ئاشتەواییە و
- نموونەیەكی بەرچاوی پێكەوەژیان و قبوڵكردنی یەكترە.
- یەكنەبوون و پەرتەوازەیی لە 100 ساڵی ڕابردوودا، لە پەنای سیاسەتی نێودەوڵەتی دژ بە بەرژەوەندی گەلی كوردستان، هەمیشە فاكتەرێكی سلبی و لە زۆر وێستگەشدا كەمەرشكێن،
- بووە. پاش یەك سەدە، هەر هەوڵ و بزاوتێك بۆ بەرپەرچدانەوەی ستەمی مێژوو، پێویستی بە یەكدەستی و یەكگرتوویی كوردستانیانە هەیە. مێژووش پێمان دەڵێت كە لە هەر وێستگەیەك
- مێژووییدا كە دەستكەوتێك بە دەست هاتبێت، بە یەكگرتوویی و یەكدەستی بە دەست هێنراوە. 4.هاوكات ئەزموونی یەك سەدەی ڕابردوو، لە لۆزانەوە تا ئێستا، پێمان دەڵێت كە خەباتی ڕزگاریخوازانەی كوردستان، دەبێت سوود لە پشتیوانی نێودەوڵەتی و ڕای گشتی وڵاتانی
- دیموكراسی، وەربگرن.
- رەوەندی کوردستانی لە دەرەوەی نیشتمان، ئێستا ڕەوەندێكی زەوەند و بەهێزە، چ لە ڕووی كەمایەتی، چ لە ڕووی چۆنایەتییەوە، پێویستە كوردستانیانی دیاسپۆرا هەوڵی زیاتر بدەن بۆ ناساندنی دۆزی گەلی کوردستان، هەموو هەوڵەکانیان بخەنە گەڕ بۆ سەرخستنی دۆزی ڕەوای کوردستان و لۆبیكردن بۆ دروستكردنی دۆست و پاڵپشتی نێودەوڵەتی زیاتر، لەمەشدا پێویستە كوردستانیانە بیر بكرێتەوە و ئەو سنوورە دەستكردانەی كە بەسەرماندا سەپێنراون، نابێت كوردستانیان خۆیان تۆختری بكەنەوە.
- ئافرەتانی كوردستان لە هەموو وێستگەكانی خەباتدا ڕۆڵی گەورە و گرینگ و كاریگەریان
- بینیووە و دەبینن، لەم دیدارەشدا بەشێكی زۆری هەوڵ و ماندووبوون و ئامادەسازیی و ڕێكخستنەكانی لە ئەستۆی خانمانی كوردستانی دیاسپۆرادا بووە، بۆیە پێویستە لە دیدارەكانی داهاتوودا، ئافرەتان لە کۆنفدراسيۆن زیاتر بەشدار بن، بە شێوەیەك بگونجێت لەگەڵ ئەو پێگە گەورەیەی ئافرەتان لە خێزان و کۆمەڵگای کوردەواریدا هەیە.
- لە کۆتاییدا پێویستە سوپاسی شارەوانی لۆزان، ناوەندی ڕەوەندی کوردستانی لە سويسرا، قسەکەران و ئامادەبووان لە پانێڵەکان بکەین، زەحمەتیان کێشا لە دوورەوە هاتن، گرێدانی ئەم دیدار بەبێ هاریکاری ئەم بەڕێزانە مەحاڵ دەبوو، دەرگای کۆنفدراسيیۆنی رەوەندی کوردستانی، وەك پلاتفۆڕم و چەتری كۆكەرەوەی كوردستانیانی دیاسپۆرا بە جیاوازی بیروڕایانەوە، ئاوەڵایە بۆ هەر پێشنیار و تێبینییەک و سەرنجێك، بۆ ئەوەی لە دیدار و كار و چالاكییەكانی داهاتوویدا لەبەرچاویان بگرێت.
- زۆر سوپاس و كوردستان هەر ئاوا بێت و بە هیوای سەفەر و گەڕانەوەی سەلامەت بۆ هەمووتان.
