دیداری شفا بارزانی لەگەڵ کلدانییەكانی شاری دیترۆیت
لە درێژەی گەشتەکەیدا بۆ ئەمریکا، شفا بارزانی سەرپەرشتیاری ڕەوەندی کوردستانی، لە شاری دیترۆیتی هەرێمی میشیگان، لەگەڵ ڕەوەندی کلدانی کۆبوە، و زۆر بە گەرمی پێشوازی لێکرا.
لە دەسپێکی ئەو دیدارەدا، بەرپرسانی ڕەوەندی کلدانی، بە ناوی ئامادەبووان و ڕەوەندی کلدانییەوە بە گەرمی بەخێرهاتنی شفا بارزانی و شاندی یاوەریان کرد و پێگەی کوردستانیان بەرز نرخاند.
دواتر شفا بارزانی سوپاسی ئەو پێشوازییە گەرمەی کرد و هەروەها سڵاو و رێزی سەرۆک بارزانی گەیاندە ئامادەبووان، دووپاتیکردەوە کە وەکو جەنابی سەرۆک بارزانی ئاماژەی پێکردووە، ”یان هەمووان پێکەوە دەژین، یان پێکەوە دەمرین”.
هەروەها لە درێژەدا شفا بارزانی باسێکی هەمەلایەنەی لەسەر دیرۆک و کولتووری پێکەوە ژیان لە کوردستان پێشکەشکرد و لەم بەستێنەدا ڕایگەیاند، کە کوردستان وەکو هەمیشە لانکەی پێکەوە ژیان دەبێ و ئێمە هەرگیز تەسلیمی هەڕەشە و گوشار و موشەک و درۆنەکانی دوژمنانی کوردستان نابین.
هاوکات بە وردی لەسەر کار و پڕۆژەکانی کۆنفدراسیۆنی رەوەندی کوردستانی قسەی کرد و، لەم بارەوە دورە دیمەنی کار و ئامانجەکانی رێکخستن و یەکخستنی کوردستانیانی لە دەرەوەی بازنەی حیزبایەتی شیکردەوە.
سەرپەرشتیاری رەوەندی کوردستانی داوای لە ڕەوەندی کلدانی کرد وێڕای هەوڵدان بۆ تێکەڵ بوون لەگەڵ کۆمەڵگەی ئەمریکادا، هاوکات پێویستە ئەوان بایەخ بە پاراستنی شوناس و ناسنامەی کوردستانی بدەن و ڕەوەند چاوی لەوەیە کە پێکەوە بۆ کوردستان تێبکۆشین.
لە بەشێکی دیکەی وتارەکەی دا، شفا بارزانی بە پێداگرییەوە باسی لەوە کرد رەوەندی كوردستانی لەگەڵ هەموو ئەو کەس و لایەنانە هاوکاری دەكەن كە باوەڕیان بە ئاڵای کوردستان و مافی دیاری کردنی چارەنووس بۆ خەڵکی کوردستان هەیە.
لە بڕگەی کۆتایی ئەو دیدارەدا، دەرگای دیالۆگێکی کراوە بۆ ئامادەبووان کرایەوە و پاش قسەو باسێکی تێروتەسەل و وڵامەکانی وتاربێژ، کۆبوونەوەکە لە کەشوهەوایەکی دۆستانەو پڕ لە هیواداریدا کۆتایی هات.
هەروەها ڕۆژی دواتر مارتەن مەنا سەرۆكی ناوەندی كلدانییەكانی ئەمریكا و كەسایەتی دیاری كلدانی رەعد ئەیار و تیمی هاوڕێیان، لەگەڵ شاندی رەوەندی كوردستانی كۆبونەوە و پشتیوانی قوڵی خۆیان بۆ كوردستان دوپات كردەوە و، لەسەر چەند بەرنامە و پڕۆژەی هاوبەش قسەیان كرد، بریاردرا پێكەوە كاریان لەسەر بكرێ و چەند خوانێك بۆ بیروڕاگۆڕینەوە و ئاشنابوونی پتر سازدرا.
