سوورە مەرگەیی..
عەرەب چ شیعە و چ سوونە کوردبوون بە تاوان دەزانن و لە زەوتکردنی خاک و ماف و ئازادیەکانی کورددا دەچنەوە سەر ئیمامی شۆفێنیزم، هەر کاتێکیش بەقەد کونی دەرزی دەرفەتیان بۆ هەڵکەوتبێ، لە دادگای عرووبەدا دادگاییان کردووین و بە فتوای ئیمامی شۆڤێنیزم سزای مەرگیان بەسەردا سەپاندووین، مێژووش پڕیەتی لەو بەڵگانەی کە شیعە و سوننەی عەرەب لە هەر بەرگێک و بە هەر ناوێک فەرمانڕەواییان کردبێ، لە بەرامبەر خواست و داواکاریە رەواکانی کورددا بۆ سیاسەتی فراوانخوازی و رشتنی کۆنەقینی عەرەبچێتی گەڕاونەوە، ئەوەش وایکردووە کورد لە هەر بەرگێک و بە هەر ناوێک داوای ماف و بە ئازادی و ژیانی کردبێ، وەک تاوان لە داواکانیان رووانیوە و وەک تاوانکاریش وەڵامی دراوەتەوە، جا ئەگەر عەرەب بەو جۆرە لە ماف و ئازادی و داواکاری کورد بڕوانێ، جا ئەگەر ئەوە رەوشت و رەفتاری عەرەب بێ، ئەی بۆچی کوردایەتی نەکەین و کوردانە هەنگاو نەنێین؟!
لەهەر تاکێکی کورد بپرسی بێ دوودڵی دەڵێ: با کوردایەتی بکەین و کوردانەش هەنگاو بنێین، بەڵام کاتێ دێینە سەر باسی کوردایەتی و رێڕەوی هەنگاوی کوردانە، رای حزبی و خواستی بەرژەوەندی کەسی زاڵ دەبن و، هەر یەکە و لە سووچی بەرژەوەندی سیاسی خۆیەوە پێناسەی کوردایەتی دەکا و، بەو ئاراستەیەشدا هەنگاو دەنێ، لێرەوە جیاوازییەکان لەسەر پێناسەی کوردایەتی درووست دەبن و هەنگاوەکانیش ئاراستەی پێچەوانە وەردەگرن.
دەبێ هەموومان لەوە بە ئاگابین، کاتێ دەسەڵاتدارانی شیعە یان سوننە، لەو حزبی کوردی نزیک دەکەوبەوە و لەویتر دوور دەکەونەوە، دووبارە کردنەوەی ئەو گەمە موخابەراتییەیە، کە ئامانج لێی لێکترازاندنی ریزەکانی ناو ماڵی کوردە و بەربەست درووست کردنە لەبەدەم هەنگاوی کوردانە، ئەگەرنا لای عەرەب کورد هەر بیروبۆچوونێکی سیاسی هەبێ و هەڵگری هەر فکرە و ئایدیایەک بێ، هەر کوردە و کوشتن و بە تاڵان بردنی سەروەت و داگیرکردنی خاکەکەی بە حەڵاڵ دەزانن، بۆیە نابێ هیچ حزب و لایەنێکی کوردی، دڵی بەوە خۆشبێ بەغدا دۆستی ئەوە و دوژمنی حزبە کوردە رکابرەرکەیەتی، دەبێ هەموو حزب و لایەنە کوردستانیەکان ئەو راستییە بزانن، کە دیکتاتۆر و شۆڤێنیەکان بۆ درێژەدان بە سیاسەتی داگیرکاری خۆیان و گەیشتن بە مەرامەکەیان سیاسەتی (پەرتکە و زاڵبە) دژی خاک داگیرکراوان پەیڕەو دەکەن، مێژووش ئەو راستییەی سەلماندووە، کە دوا ئامانجی عەرەب لەناوبردنی کورد و بە عەرەبستان کردنی کوردستان و بە تاڵان بردنی سامانەکەیەتی.
کوردایەتی نەکردن و هەنگاو نەنانی کوردانە زۆر دەرفەتی وای لەدەست داوین، کە تەنها بە کوردایەتی و هەنگاوی کوردانە قەرەبوو دەکرێنەوە، بۆ ئەو مەبەستەش دەبێ کورد بەقەد رقی عەرەب لە کوردایەتی، کوردایەتی خۆش بوێ و بە هەنگاوی کوردانەش وەڵامی هەنگاوەکانی عرووبە بداتەوە، لە فراوانخوازی عەرەبیشەوە خاک و وڵاتەکەی خۆش بوێ، واتا کوردایەتی و هەنگاوی کوردانە بکەینە وەڵامدەرەوەی بوغزوکینەی عرووبە و هەنگاوەکانی عەرەبچێتی، نەتەوەپەروەری بکەینە کارنامە و پلانی بەگژدا چوونەوەی پیلانگێڕیەکانی نەتەوەپەرستی، خۆشەویستی خاک بکەینە وەڵامی سیاسەتی داگیرکاری و فراوانخوازی داگیرکاران، ئەوەش دەمانخاتە بەردەم ئەو ئەرکە نەتەوەیی و نیشتیمانیەی، کە وەڵامی درووشمی ساختەی برایەتی و، هەرای فرودەری پێکەوەژیان و، خۆ نزیک کردنەوەی عەرەب بە هەر ناوێک لێمان، کە لە ساتەوەختی زۆر هەستیار و چارەنووسسازدا کردوویانەتە تەوقی گەردنی کوردایەتی و کۆسپی بەردەم هەنگاوی کوردانە، بۆیە دەبێ (هەژار) ئاسا بڵێین:ــ
بە کوردی دەژیم بە کوردی دەمرم
بە کوردی دەیدەم وەڵامی قەبرم
بە کوردی دیسان زئندوو دەبمەوە
لەو دنیاش بۆ کورد تێهەڵدەچمەوە
لە بەرامبەر خۆشەویستی خاک و وەڵامی سیاسەتی داگیرکاری و فراوانخوازی عەرەبیش (دڵدار) ئاسا بێینە دەنگ و هاوار بکەین و بڵێین:ــ
ئێمە رۆڵەی میدا و کەیخوسرەوین
دینمان ئاینمان هەر نیشتیمان
