لە ترسنۆکیم سەرسام مەبە
زۆر هەوڵمدا کە بوێربم
مەشقم لەسەر بونی خۆمکرد
هێندە ..!
تامەزرۆی مەلەکردن بووم لە نێو دەریادا
ھەروەک تینویەک بۆ قومێ ئاو لە سارادا
کە نزیکی دەبومەوە
لە شەپۆلەکانیش سڵم دەکردەوە
ھێندە پۆشتەی
نێو نەریتەکانی ڕۆژگاری تەمەنم بووم
دەریاش قێزی لێدەکردمەوە
وەک ئەوەی بە بۆنم نامۆبێ
نەبا ماسێەکان
بەبۆنکەون و ئەو بەجێ هێڵن
نەبا مرواریەکان
زەرد هەڵگەڕێن ڕەنگی من بگرن
هێندە ئارەزوی مرواریم دەکرد
بیکەمە گەردنم
بۆیە هەر چی بەرگ هەبوو
دامدڕی و یەک یەک فڕێمدا
خۆم فڕێدایە نێو قوڵایی دەریا
جەستەم ..!
چەشنی گیانەوەرە ئاویی یەکان
ھۆگری دەریا ببوو
چەشنی ئەوان
لەگەڵ شەپۆلەکان پڕ لەگەمەو ئاوێزان بووم
بیرم چوبوو.. بۆ دەنکێ مرواری ھاتووم
هێندە عاشقی شەپۆل بوم
وتم ئەی نەزان
کوا مرواری لەم شەپۆلە دەست دەکەوێ ..!؟
هەتا ئێستا دەخولێمەوەو مەلەدەکەم
سەد مەخابن ..!
نەگەیشتووم بە دەنکێ مرواری ئاواتم
پەری عەبدە
18/8/2021
