جێگری سەرۆكی حكوومەتی هەرێمی كوردستان رایگەیاند، حكوومەت پێداویستییەكانی دەستپێكردنی پڕۆسەی خوێندن دابین دەكات، بۆ ئەوەی لە 14/ 9/ 2021 خوێندن لە قوتابخانەكان دەست پێبكات و ئەو بەروارەش بۆ دەستپێكردنەوەی پرۆسەكە كرایە بڕیار.
ئەمڕۆ شەممە، قوباد تاڵەبانی جێگری سەرۆكی ئەنجوومەنی وەزیران، سەرۆكایەتی كۆبوونەوەیەكی بۆردی پەروەردە و خوێندنی باڵای كرد، كە تایبەت بوو بە دەستپێكردنەوەی پڕۆسەی خوێندنی ساڵی 2021_ 2022، لەگەڵ چەند بابە‌تێكی دیکەی تایبەت بە رەوشی خوێندن و قوتابیان.
سەرەتای كۆبوونەوە باس لە ئامادەكارییەكان و دابینكردنی پێداویستییەكانی خوێندن و خوێندكاران كرا لە‌ناو پۆلە‌كان، لەگەڵ پابەند بوون بە رێنماییەكانی تەندرووستی و خۆپارێزی لە ڤایرۆسی كۆرۆنا، جێگری سەرۆكی ئەنجوومەنی وەزیران، جەختی كردەوە، حكوومەت پێداویستییەكانی دەستپێكردنی پڕۆسەی خوێندن دابین دەكات، بۆ ئەوەی لە 14/ 9/ 2021 خوێندن لە قوتابخانەكان دەست پێبكات و، ئەو بەروارەش بۆ دەستپێكردنەوەی پڕۆسەكە كرایە بڕیار.
