به ئاماده‌بوونى پارێزگارى هه‌ولێر و به‌رپرسانی ته‌ندرووستی و په‌روه‌رده، بۆ خێراكردنى پڕۆسەی پێدانی ڤاكسین، له رێوره‌سمێكدا، سه‌نته‌رى مامۆستایان بۆ ڤاكسین، له لایه‌ن به‌ڕێوه‌به‌رایه‌تى گشتی ته‌ندرووستى كرایەوە، كه رۆژانە 500 مامۆستا دەتوانن لێی ڤاکسین وه‌ربگرن.
ئه‌مڕۆ سێشەمە لە میانەی کردنەوەی سەنتەركی تایبەت بۆ وەرگرتنی ڤاکسین لە شاری هەولێر، ئومێد خۆشناو پارێزگارى هه‌ولێر بۆ مێدیاکان، رایگەیاند: كردنەوەی ئەو سەنتەرە کارێکی زۆر گرینگە، کە رۆژانە دەتوانێت 500 مامۆستا ڤاكسینی پێ بدرێت، به‌وه‌ش ده‌توانن خزمەتی زیاتری مامۆستایانی شارەکە بكەن.
ئاماژەی بەوەشدا، کە دەیانەوێ له‌گه‌ڵ دەستپێكردنەوەی پڕۆسەی خوێندن له شاره‌كه‌یان، ته‌واوى مامۆستایان ڤاكسینیان وه‌رگرتبێت و، هیچ گرفتێكی تەندرووستی نەمابێت، تا مامۆستایان بەردەوامی به پڕۆسه‌ى خوێندن بدەن.
