ئەندامێکی لیژنەی دارایی ئەنجوومەنی نوێنەرانی عێراق دەڵێ، بۆ یەکەمجار لە دوای ساڵی 2019وە، عێراق زیادەی دارایی لە داهاتیدا دەبێت و هیچ کورتهێنان لە بودجەیدا نییە و، مووچەی سەرجەم فەرمانبەرانیش بە مسۆگەری و بێ دواکەوتن و لێبڕێن دابەشدەکرێت.
ناجی سەعدی، لە لێدوانێکی میدیایدا رایگەیاند، هیچ کێشەیەکی کورتهێنان لە بودجەی عێراق نەماوە و، مووچەی فەرمانبەران هیچ مەترسییەکی لەسەر نییە، ئەو زیادەیەی کە لە بودجەدا هەیە دەتوانرێت لە ترفیع و علاوە سوودی لێ وەربگیرێت و، دووبارە فەرمانبەرانی عێراق مووچەکانیان بەرەو زیادبوون بڕواتەوە، سەرجەم فەرمانبەری وەزارەتەکان بەپێی پلەی کارکردنیان مووچەکانیان بۆ زیاد بکرێت.
دەربارەی بەرزەمووچە، یاخود ترفیع، سەعدی ئاماژەی بەوەکرد، چەندین ساڵە ترفیع و عەلاوەی فەرمانبەران وەستاوە، لە ئێستادا نیەتێک هەیە بۆ دووبارە دەستپێکردنەوە، چەند وەزارەت ئامادەی خۆیان دەربڕیوەم وەک وەزارەتی پەروەردە، دواتر دەست دەکرێت بە سەرجەم وەزارەتەکانی دیکە و بەرزە مووچە بۆ سەرجەم فەرمانبەران دەکرێت.
