ل گوندێ ڤەلچانسکۆیێ ل پارێزگەھا ڤەرۆنیچ یا رووسیایێ، مالباتەکا کورد راستی ئێریشەکێ ھات و د ئەنجامێ دا 3 کەس ھاتن کوشتن. ل گۆر کەسێن ژ بوویەرێ ڤە نێزیکن دبێژن، ئێریش نژادپەرەستی بوو.
ل گۆر زانیاریێن پەیامنێرێ K24ێ ل رووسیایێ، رۆژا 16ێ ڤێ مەھێ 3 ئەندامێن مالباتەکە کورد ژ ئالیێ کەسەکی رووسی یێ ب ناڤێ ڤیکتۆر میرسکۆی ڤە ھاتن کوشتن. کەسێن ھاتنە کوشتن، گولستان ئیبراھیمۆڤ یا (59 سالی)، نادر (19 سالی) و عەزیز (5 سالی) نە.
پەیامنێرێ K24ێ دیار کر، ئەڤ مالباتا کورد ژ بەری 20 سالان ڤە ژ قەرقیزستانێ کۆچبەری ڤی گوندی بوویە و لێ دژیت. ل گۆر گۆتنێن خەلکێ گوند ژی، پێشتر ڤێ مالباتێ چ پرسگرێک لگەل کەسێ دا نە بوو، لێ شەڤا 16ێ ڤێ مەھێ کەسەکێ رووسی یێ ب ناڤێ ڤیکتۆر میرسکۆی ئێریشی سەر ڤێ مالباتێ کر و ھەر سێ ئەندامێن مالباتێ کوشتن.
ل گۆر کو ئاسیا کەچا گولستانێ دبێژیت، ئێریشکەر دەستپێکێ عەزیز دخەنقینیت، پشترا ب چەک نادر دکوژیت، د وی دەمی دا گولستان کو ل دەرڤەیێ مالێ دبیت، ئێریشکەر گولـلەیان لی درەشینیت و دکوژیت.
ل گۆر شۆپاندنا پەیامنێرێ K24ێ ژ بۆ وێ بوویەرێ، کەسێن نێزیکی وێ بوویەرێ دبێژن، کوژەرێ ڤێ مالباتێ پێشتر گەفا دەرکرنا تەڤاھیا کوردان ژ ڤی گوندی کریە.
نھا کوژەر ژ ئالیێ پۆلیسان ڤە ھاتیە دەستەسەرکرن و لێکۆلین د ڤێ ئێریشێ دا بەردەوامن.
گوندێ ڤەلچانسکۆ 165 کم ل باشوورێ ڤەرۆنیچە و 400 کەسێن رووسی، کورد و نەتەوێن دی لێ دژین.
سەرچاوە : دارکا مازی
