ئەبوحسێن حەمیداوی، ئەمینداری گشتیی کەتائیبی حزبوڵای عێراقی، هۆشداری دەداتە نێردەی نەتەوەیەکگرتووەکان، یا پێویستە هەمووان لە ئاسایش و سەقامگیریدا بن، یان هیچ لایەک.
حەمیداوی لە کۆبوونەوەی لایەنەکانی “چوارچێوەی هەماهەنگی شیعەکان”، کە جنین پلاسخارت، نێردەی تایبەتی سکرتێری گشتیی نەتەوەیەکگرتووەکان ئامادەبووە، گوتوویەتی، “پەیاممان بۆ ئەو دەوڵەت و دامودەزگایانەیە، کە دۆخی ئێستا دەگوازنەوە و هاوکاری ساختەکاری و دزینی ئیرادەی گەلی عێراق بوون بە هاوکاری لایەنی نێوخۆیی، پێیان دەڵێین، گرەوکردنتان لەسەر وەلانانی کۆمەڵێکی کاریگەر بێ ئەنجام دەبێت، هەروەها هەوڵەکانیشتان بۆ نانەوەی فیتنە و ئاگری نێوخۆیی بە کۆششی ژیرەکان لەنێو دەچێت”.
حەمیداوی باسی لەوەشکردووە، “ئەگەر ئەمە ڕووبدات، با دڵنیابن لەوەی کە ئاگرەکانی ئەم شەڕە سەرەتا ئەمەریکا و قەوارەی زایۆنیست و سەرانی سعوودیە دەسوتێنێت”.
رۆژنامەی ئەلعەرەبی چاپی لەندەن، بڵاوی كردەوە، کە لایەنە شیعیە ناڕازییەكان لە هەڵبژاردن، لەنێو خۆیاندا كەوتوونەتە ناكۆكییەوە، كۆبوونەوەیەكی چاوەڕوانكراویشیان لە ماڵی مالیكی شكستی هێناوە.
