وەزارەتی نەوتی عێراق ئەمڕۆ پێنجشەممە ڕێککەوتننامەیەکی لەسەر پرەنسیپە سەرەتاییەکانی پڕۆژەی پاڵاوگەی فائۆ و ئاڵۆزی پترۆکیمیایی لەگەڵ کۆمپانیایەکی چینی واژۆکرد.
ئیحسان عەبدولجەبار وەزیری نەوتی عێراق، لە پەراوێزی واژۆکردنی گرێبەستەکە، لە کۆنگرەیەکدا بۆ مێدیاکان، رایگەیاند، وەزارەتەکەیان لە لایەن پاڵاوگەکانی باشوورەوە نوێنەرایەتی دەکرێت و گرێبەستێکی لەگەڵ hualu ، کە سەر بە کۆمپانیای cncec چینە بۆ وەبەرهێنانی 300 هەزار بەرمیل لە ڕۆژێکدا، هاوکات پڕۆژەکە 7 ملیار دۆلاری تێچووی وەبەرهێنانی هەیە، وەک قۆناغی سەرەتایی و دواتر لە قۆناغی دووەمیدا زیاتر بەرزدەبێتەوە.
ئەوەشی روونکردەوە، کە پڕۆژەکە عێراق دەکاتە وڵاتێک کە گونجاوە بۆ وەبەرهێنان و لە ساغکردنەوە و دابینکردنی بەرکەوتەکانی نەوت لە بەرزترین پێوەرە نێودەوڵەتییەکاندا.
ئەوەشی خستەڕوو کە پڕۆژەی خوێندنی تەکنیکی و ئەندازیاری بۆ پڕۆژەکە، لە ساڵی 2015ەوە ئامادەکراوە و چوار کۆمپانیای نێودەوڵەتیش داوای وەبەرهێنانیان کردووە لە پڕۆژەکە و، کۆمپانیای چینیش سەرکەوتنی بەدەستهێناوە.
نوێنەری hualu ، ئەحمەد عەبدوللەتیف رایگەیاند، کۆمپانیاکە پڕۆژەکە بە گوێرەی باشترین تەکنەلۆجیای نێودەوڵەتی جێبەجێ دەکات، هاوکات جەختیشیکردەوە، کە پڕۆژەکە دەبێتە یەکەم و گەورەترین پڕۆژەی جۆری خۆی لە هەرێمدا.
لە قۆناغی یەکەم دروستکردنی پاڵاوگەی فائۆ دەبێت، کە لە ڕۆژێکدا 300 هەزار بەرمیل لە 7 بۆ 8 ملیار دۆلار بەرهەم دەهێنرێت و، قۆناغی دووەم دروستکردنی ئەو ئاڵۆزییە پترۆکیمیاییە دەبێت بە بەرهەمهێنانی 3 ملیۆن تەن لە ساڵێکدا و بە تێچووی وەبەرهێنانی 12 ملیار دۆلار.
