ئەمڕۆ ساڵوەگەڕی رۆژی جیهانی پەنابەرانە كە دەكاتە 20ی حوزەیرانی هەموو ساڵێك و هاوكاتی تێپەڕبوونی 60 ساڵە بەسەر رێككەوتنی پەنابەران لە ساڵی 1951.
لە رۆژی پەنابەراندا نەتەوە یەكگرتووەكان داوا دەكات پشتیوانی پەنابەران بكرێت لە جیهاندا بخرێنە ژێر خزمەتی چاودێریی تەندروستیی و فێركردن و وەرزشییەوە و پارێزگارییان بۆ دابینبكرێت.
كۆمسیۆنی پەنابەرانی سەر بە نەتەوە یەكگرتووەكان هەوڵ دەدات بۆ فراوانكردنی تواناكانی بۆ گەیاندنی چاودێریی تەندروستیی و خزمەتگوزارییەكانی دیكە و گەیاندنی خوێندن بۆ منداڵان.
ساڵانە لە ئەم رۆژەدا كۆمەڵێك چالاكیی دەكرێن بۆ پشتیوانی بۆ پەنابەران كە پەنابەران خۆیان تێیدا بەشداری دەكەن لە پاڵ بەرپرسانی حكومیی و كۆمپانیاكان و رێكخراوەكان.
ژمارەی پەنابەران و ئاوارەكان بەهۆی شەڕ و توندوتیژییەكانەوە لە ساڵی 2020 زیادیانكردووە گەیشتووەتە 82.4 ملیۆن كەس، ساڵی پێشتر 2019 بریتی بووە لە 79.5 ملیۆن كەس.
فیفیبوو گراندیی بەڕێوەبەری كۆمسیۆنی پەنابەرانی سەر بە نەتەوە یەكگرتووەكان دەڵێت: هەرچی لە تواناماندا هەبێت بۆ هاوكاریی پەنابەران دەیكەین، هەوڵ دەدەین پشتیوانیی جیهانی كۆبكەینەوە، بەڵام هاوكارییەكان كەمن.
دەشڵێت: لە رۆژی جیهانیی پەنابەران و هەموو رۆژێكدا ئێمە و هاوكارانمان هەوڵەكانمان چڕدەكەینەوە بۆ هاوكاریی پەنابەران.
ملیۆنان كەس لە جیهاندا لە هونەرمەندان و موزیسیانەكانیش رێوڕەسم رێكدەخەن بەبۆنەی رۆژی جیهانیی پەنابەرانەوە، لە رێگەی كۆمەڵێك چالاكییەوە بەهۆی ئاوارەبوون و پەنابەربوونی كۆمەڵێك و هەڵهاتنیان لە ماڵ و شوێنەكانیان بەهۆی جەنگ و توندوتیژیییەكانەوە.
پەتای كۆرۆنا هێندەی دیكە كێشەی پەنابەرانی ئاڵوز كردووە لە جیهاندا، بە جۆرێك لە نیوەی ساڵی رابردوودا رێژەی كۆچبەران گەیشتووەتە 80 ملیۆن كەس بەپێی داتاكانی نەتەوە یەكگرتووەكان.
