ناوەندی ڕەوەندی کوردستانی-لەندەن، بەیاننامەیەکیان لەسەر ڕۆژی ئاڵای پیرۆزی کوردستان بڵاوکردەوە، کە تێیدا لە دوو رۆژی یەک لە دوای یەکدا، لە پێناو بەرز ڕاگرتنی ئەو رۆژە و لە رێککەوتی 17و18ی ئەم مانگە، لەبەردەم پەرلەمانی بەریتانیا چالاکی ئەنجام دەدەن، هاوکات داواش لە کوردانی نیشتەجێی ئەو شارەش دەکەن، کە ئامادەی ئەو بۆنە پیرۆزە بن.
دەقی بەیاننامەکە:
ڕۆژی ئاڵای کوردستان پیرۆز بێت
بەمەبەستی بەرز ڕاگرتنی ئاڵای پیرۆزی کوردستان و، ئاشناکردنی منداڵان و گەنجانی کورد لە تاراوگە، ناوەندی ڕەوەندی کوردستانی بە هاوکاری خوێندنگە کوردییەکانی شاری لەندەن، ڕۆژی 17 ی 12، ڕۆژی ئاڵای پیرۆزی کوردستان بەرز رادەگرن.
ئاڵا نیشانە و ناسنامەی وڵاتانە، ئەمڕۆ ھەموو گەل و نەتەوەیەك خاوەن وڵاتێکی سەربەخۆ بن، یا سەربەخۆ نەبن، خاوەنی ئاڵای تایبەت بەخۆیانن، ئاڵای ھەر نەتەوەیەك لەگەڵ نەتەوەیەکی دیکە جیاوازە، چ لە ڕەنگ و شێوە، چ لە واتادا.
لەم بۆنە تایبەتەدا باس لە مێژووی ئاڵای کوردستان و لێکدانەوەی ڕەنگەکانی بۆ منداڵان و گەنجان و باوانیان باس دەکرێت.
هاوکات ناوەندی ڕەوەندی کوردستانی-لەندەن، لە رێککەوتی 18ی12ی2022وە، هەڵدەستن بە سازدانی هەڵکردن و نمایشکردنی گەورەترین ئاڵای کوردستان.
بەوبۆنەوە داوا لە سەرجەم کوردانی دانیشتووی لەندەن دەکەین، لەو رێککەوتەدا بەشداری ئەو مەراسیمە پیرۆزە نەتەوەییە بن، کە کاتژمێر 1ی پاش نیوەڕۆ و لە بەردەم پەرلەمانی بەریتانیا ئەنجام دەدرێت، تا بەهەمووانەوە رۆژی ئاڵای پیرۆزی کوردستان بەرز و پیرۆز رابگرین.
هەر شەکاوە بێت ئاڵای پیرۆزی کوردستان
ناوەندی ڕەوەندی کوردستانی-لەندەن
