کۆنفدراسیۆنی ڕەوەندی کوردستانی، بەبۆنەی ساڵوەگەڕی دامەزراندنی کەناڵی ئاسمانی کوردستان تیڤی، پەیامێکی پیرۆزبایی ئاڕاستەی بەڕێوەبەر و کارمەندانی کەناڵەکە دەکەن، هاوکات ئەوەش دەڵێن، کە ئەو کەناڵە پێگەیەکی بەهێزی لە گەیاندن و گواستنەوەی رووداوەکان لە کوردستانەوە بۆ ڕەوەندی کوردستانی لە دەرەوە هەبووە.
دەقی پەیامەکە
بەڕێزان بەڕێوەبەر و ستافی گشتی کەناڵ و کارمەندانی کوردستان تیڤی تێکۆشەر
بەبۆنەی دامەزراندنی یەکەمین کەناڵی سەتەلایەتی کوردی کە لە خاکی کوردستانی ئازاد و، پێش 24ساڵ پەخشکرا، بەناوی کۆنفدراسیۆنی ڕەوەندی کوردستانی، گەرمترین پیرۆزباییتان ئاڕاستە دەکەین، هیوادارین دەنگ و ڕەنگی کوردستان تیڤی وەکچۆن هیوای کوردستانیان بووە لە دەرەوە و ناوەوە، بە ئومێدین ئەم ڕێبازە خۆویستە دەوڵەمەند بە بیر و هۆشی کوردایەتی بەردەوام بێت.
بێگومان 24 ساڵە کوردستان تیڤی پێگەیەکی بەهێزی لە گەیاندن و گواستنەوەی ڕووداوەکان لە کوردستانەوە بۆ ڕەوەندی کوردستانی لە دەرەوە هەبووە، هەڵگری خواست و هیوای کوردستانیان و، پرشنگی گەشی ڕێبازی ڕاستی کوردایەتی کازیوەی دەم بەیان بوون، بۆیە مایەی شانازی و هیوای خەڵکی کوردستانن.
لەم یادەمەزنەدا، دووبارە پیرۆزبایی 24ساڵەی دامەزراندنی کوردستان تیڤی دەکەین، بەهیواین لە داهاتوو دەنگ و ڕەنگی ڕەوەندی کوردستانیان پێگەیەکی بەهێز لەنێو پڕۆگرامەکانتاندا هەبێت و، تێکەڵ بە دەنگ و ڕەنگی ناوخۆی کوردستان بکرێتەوە.
کۆنفدراسیۆنی ڕەوەندی کوردستانی
16.01.2023
