ئەمڕۆ 36ساڵ بەسەر کارەساتی کیمیابارانکردنی هەڵەبجەی شەهید تێپەڕ دەبێت، کە لە 16.03.1988 حکومەتی پێشووی عێراق بە چەکی قەدەغەکراو ئەو شارەی کیمیاباران کرد و هەزاران ژن و منداڵی بێگوناهی شارەکەی شەهید کرد و، بە دەیان هەزار هاوڵاتی بریندار کرد و خەڵکەکەشی ئاوارەی ئۆردوگاکان کرد، تا ئێستاش شوێنەواری ئەو چەکە قەدەغەکراوە بەسەر خەڵکی ناوچەکە و دانیشتوانەکەیەوە ماوە .
هەڵەبجە زامێکە بە جەستەی نیشتمانەوە و پەڵەیەکی ڕەشە بە نێوچاوانی دوژمنانی کوردستان، کە بەهەموو جۆرە چەکێکی قەدەغەکراو هەوڵی خامۆشکردنی بزاڤی گەلی کوردستان دەدەن، یادکردنەوەی ئەم کارەساتە، نیشاندەری ڕق و کینەی دوژمنانە بەرامبەر بە خەڵکی کوردستان و هێمای ئەو ستەمکارییەیە، کە بەرامبەر خەڵکی کوردستان کراوە.
لە یادی ئەم کارەساتەدا، کۆنفدراسیۆنی ڕەوەندی کوردستانی، سەری ڕێز و نەوازش بۆ شەهیدانی هەڵەبجە دادەنوێنن و، تراژیدیای ئەم مەرگەساتەش هەمیشە لە یادمان دەمێنێتەوە.
سڵاو لە گیانی پاکی شەهیدانی هەڵەبجەی شەهید و گشت شەهیدانی کوردستان.. قوربانیانی ئەو کارەساتە هەمیشە لە یادمانن و هاندەرمان دەبێت بۆ یەکگرتوویی و کاری هاوبەشی زیاتر لە پێناو یەکڕیزی بۆ داوای مافی گەلەکەمان.
کۆنفدراسیۆنی ڕەوەندی کوردستانی
16.03.2024
