وەزارەتی دەرەوەی عێراق، دەڵێ، دەست دەکەن بە پێدانی پاسپۆرت بەو پەنابەرە عێراقییانەی لە سنووری نێوان بیلاڕووسیا و لیتوانیا گیریان خواردووە.
ئەحمەد سەحاف، گوتەبێژی وەزارەتی دەرەوەی عێراق، لە راگەیەندراوێکدا کە ئاژانسى هه‌واڵى عێراق بڵاویکردووەتەوە، رایگه‌یاندووە، وەزارەتی دەرەوە بەدەنگ داواکاری بەشێک لە پەنابەرانی گیرخواردووی عێراق، لە سنوورى نێوان لیتوانیا و بیلاڕووسیا دەچێت، ئەویش بە پێدانی پاسپۆرت پێیان.
ئاماژەی بەوەشداوە، باڵیۆزخانەی عێراق لە پۆڵەندا، شاندێکی ناردووە بۆ سنوورەکانی نێوان بیلاڕووسیا و لیتوانیا، بە ئامانجی پێدانی پاسپۆرت بەو پەنابەرانەی بەنیازن بە خواستی خۆیان بگەڕێنەوە.
لە راگەیەنراوەکەدا هاتووە، یەکێکی دیکە لە ئامانجی ناردنی شاندەکەی باڵیۆزخانە بۆ ئەو ناوچەیە، ئاگاداربوونە لە دۆخی مانەوە و گوزەران و پێداویستییە مرۆییەکانیان.
