نەجمەدین محەمەد قەراجی
دوو شەو بەر لە ئێستا، سوپای پاسدرانی ئێران بە مووشەکی بالیستی، هەولێری پایتەختی هەرێمی کوردستانی بۆردومان کرد، ئەمە لە كاتێكدایە كە لە هەولێرەوە هیچ هەڕەشە و كێشەیەك بۆ كۆماری ئیسلامیی ئێران نەبووە و نیە. بەداخەوە لە ئەنجامی ئەو مووشەكبارانەی سوپای پاسدارانی ئێراندا كە ماڵی سەرمایەداری ناسراوی شاری هەولێر (پێشرەو دزەیی) كردە ئامانج، كاك پێشڕەو شەهید بوو و لەگەڵ ژینای كچی كە تەمەنی تەنیا یەك ساڵ دەبوو، وێڕای گیانلەدەستانی خانمێكی كارگوزار و بە سەختی برینداربوونی هاوسەر و كوڕەكانی شەهید پێشڕەویش.
لە هەموو ئەمانە ناخۆشتر ئەوە بوو كە لەو دەمەی میدیاكان تەرمی سووتاوی ژینای تەمەن یەك ساڵیان پیشان دا و گوتیان ژن و منداڵیش هەموو بریندارن و باوكی ژیناش شەهید بووە، ئا لەو كاتەدا فەرماندە باڵاكانی سوپای پاسداران بە شانازییەوە مووشەكەكانیان پیشان دەدا و دەیانگوت: ”مووشەكە زیرەك و وردەكانمان بنكەی سیخووڕیی مۆسادیان لە هەولێر كردووەتە ئامانج!“ ئەرێ تۆ بڵێی ژینای یەك ساڵان ئەندامی مۆساد بووبێت؟
ئەی دەسەڵاتدارانی كۆماری منداڵكوژ و سوپای پاسدارانی خاوەن مووشەكی منداڵكوژ، پێم بڵێن، ئەو ژن و منداڵانە دەزانن مۆساد چییە، تا ئەندامی مۆساد بن؟ یان ئێوە لە بناغەوە ئێوە باوەڕتان بە تیرۆرە؟ ئاخر ئەوەی دژی هەولێر خۆتان و میلیشیاكانی كلكتان كردووتانە و دەیكەن، بە هەموو پێناسەیەك تیرۆرە، كەچی كۆمیدیا ئەوەیە وەزیری دەرەوەتان دەڵێ: ”ئێمە لە بنكەی تیرۆریستیمان داوە!“
ئێوەی دەسەڵاتدارانی كۆماری ئیسلامیی ئێران، تەنیا بە گەلانی ئاشتیخواز و ئارامی وەكوو كورد دەوێرن كە دەوڵەتیان نیە، هەرگیز بوێریی ئەوەتان تیا نەبووە و نیە، راستەوخۆ لە ئیسرائیل و لە ئەمریكا بدەن. ئێوە یەك مووشەكتان نا بە پاكستانەوە، ئەوەتا لە پێرێوە تا ئەم بەیانیە، پاكستان چەندین جار لەنێو خاكی ئێراندا ئۆپەراسیۆنی سەربازیی كرد لە دژتان، فەرموون ئەگەر یەك تۆزقاڵ شەهامەت و مەردایەتییتان تیایە بوێرن وەڵامێكی سوپای پاكستان بدەنەوە تەنانەت ئەگەر بە قسەش بێت، ئەی كوا مووشەكە زیرەكەكانتان؟
بەڵام ئێوە ڕق و كینە و بوغز و تیرۆری خۆتان تەنیا بەسەر گەلی كورردا دەڕێژن، رۆژانە دەیان كچ و كوڕی گەنجی خۆتان لەسێدارە دەدەن، بەڵام ناوێرن راستەوخۆ تەقە لە یەك سەربازی ئیسرائیلی بكەن، ئێوە چاوتان بە ئارامی و پێشكەوتنی هەولێر هەڵنایەت چونكە گەلانی خۆتان لەبرسا كوشتووە و داهاتەكەیان دەدەن بە مووشەك و بەسەر حەماس و حزبوڵا و حووسییەكاندا دابەشی دەكەن.
