هەڵۆ بەرزنجەیی ١١/٣/٢٠٢٤
پێش چەند ساڵێک، دوای مەرقێکی زۆر دیوانی شاعیر جەلال مەلەکشام دەستکەوت .. هەر زوو خوێندمەوە و وتارێکی دوورودرێژم لەسەر نووسی بەناونیشانی
[[[ بە ھەگبەیەکی کوردانەوە، گەشتێک بە دیوانەکەی (جەلال مەلەکشا) دا ]]]
وتارەکە بەخێرایی بووە جێی ڕەزامەندی خوێنەران. پاشان لەسەر داوای کاکە {شوانە}ی بەرپرسی ماڵپەڕی [بۆکان- ڕۆژهەڵات] درێژەم بە نووسینەکە دا و تا ئێستا بە زنجیرە لە ماڵپەڕی ناوبراودا بڵاو دەکرێتەوە..زۆرن ئەوانەی دەستخۆشییان لە کارەکەم کرد! دیارترینیان کە لەبیر ناچێتەوە
ڕەوانشاد و هەمیشە زیندوو کاک (پۆڵا نانەوازادە) بوو..
کاک پۆڵام وەک ناو و بنەماڵە و دەنگبێژی ڕادیۆ و شاعیر دەناسی و ئەو لەمێژبوو ئامادەیی خۆی لەو پانتاییانەدا سەلماند بوو. لە بۆنەیەکیشدا کە بۆ رۆژنانەنووس کاک عەلی جوانمەردی لەبەرلین ساز درابوو، ئەویش بە شيعرێک و بەشداری تر لەگەڵمان بوو..
ئێوارەیەک زەنگێکی لێدا و دوای چاک و چۆنی بە کورتە پێشەکییەک چووینە ناوباسوخواستی زۆرەوە و پێکەوە ئاخافتین!.. فرە خۆشحاڵ بووم بە زمانی شیرین و هەست و باوەڕی بێگەردی کوردایەتی و مێژووی تێکۆشان و دڵسۆزی..
زۆر بە گەرمی قسەی هێنایە سەر وتارەکەم لەمەڕ مەلەکشاوە و ئافەرینی لێ کردم..ڕاستەوڕاستیش داوای کرد گفتی بدەمێ، هەرکات دیوانەکەی چاپ بوو، بەهەمان هەناسە و شێواز و رۆحی کوردانەوە لەسەر ئەویش بنووسم..
پۆڵا نانەوازادە خۆی بە بەرۆگری شیعر و ڕێچکەی خانی و حاجی و پەشێو و مەلەکشا دەزانی . بەم قوتابخانە شیعرییە سەرسام بوو! هەژار و هێمنی زۆر لا بەرز بوون!..
پۆڵا ئەوەی ڕوون کردەوە کەوا شیعرەکانی بۆ خۆشەویستی نیشتمانە و باوەڕی نەتەوایەتی هەڵگرتووە و کەم و زۆریش لە کار و بیرکردنەوەی من ئاگادارە…
منیش پێم وتەوە بەهەمان ئەندازە منیش پێ ئاگانیم لە تۆ- بە تایبەت ئەو ساتە بەچەند ئەڵقەیەک بیرەوەریەکانی خۆی نووسیبووە و بڵاوی دەکردەوە و بەتامەزرۆوە دەمخوێندەوە.
ئەم گفتوگۆیەی زۆر پێ خۆش بوو!. بەکورتی پێکەوە کاتێکی بەتام چێژ و پڕ لە باسی کوردایەتی و ئەدەبیمان بە قسەکردن تێپەڕاند!..خۆشم نەمزانی چۆن دەوری کاتژمێرێک زیاترمان بەسەر برد و هیچ بێزار نەبووین ..
ئیدی ئەوە بوو بێ ئەوەی هیچ ئاستەنگ و ئاڵۆزی و منجەمنجێ بکەم لەگەڵیدا، دەمودەست گفتی کوردانەم دایە کەوا بە خۆشحاڵییەوە ئەو کارە ئەنجام دەدەم.
پێم وت: سەرەتا وا باشە دیوانەکە بخوێنمەوە و سەروبەر ی شارەزا بم، ئەوسا قۆڵی لێهەڵدەماڵم..
لێ ناخۆشترین باسێکی پێش خواحافیزیمان لەیەکتر بریتی بوو لەوەی وتی: باری تەندروستی زۆر باش نییە و زوو زوو دەچێتە نەخۆشخانە، جا ئەگەر ماوەیەک دیار نەما ، ئەوە بزانم کەوا لە نەخۆشخانەیە!…درکاندنی ئەم ڕازە بە ئەسپایی کسپەی لە جەرگمەوە هەستان و هێندەی تر مەحکومی کردم کەوا ئەمەکداری گفتەکەم بم!..دڵی ئەو شاعیر و کەسایەتییە جوانە نەشکێنم!
ڕۆژ هات و چوو، گرفت و کارەسات و ناخۆشییەکان زۆر بوون، نە ئەو دەنگی بووەوە و نە منیش سەرم پەرژا وەدووی ئەو گفت و ئەرکە بکەوم!… بەتایبەت جاروبار دەمبیست ناساغە!..
ئەوا ئێستا چەند ڕۆژێک دەبێت کاکە پۆڵای کوردایەتی چاوە گەشەکانی لێک ناوە و بەجێی هێشتووین . بەڵام مێژوویەکی تژی لەسەربەرزی و تێکۆشان و چەندەها شیعر و پەخشان و نووسینی پاش خۆی بەیادگار بۆ جێهێشتووین!..
شایانی وتنە ڕەوانشاد لە بنەماڵەیەکی دیار و تێکۆشەری کوردایەتی شاری مەهابادی خۆڕاگر و سەرکەشن و پۆڵا هەر لەلاوێتییەوە تێکەڵی کۆڕی خەباتی کوردایەتی بووە. لە سەردەمی رژێمی شای گۆڕبەگۆڕدا لە پای خەباتی کوردایەتی زیندانی کراوە، پاشان لەگەڵ شۆڕشی گەڵانی ئێراندا دەبێتە پێشمەرکەی حیزبی دیموکراتی دایک و ڕۆڵی گرنگ لەبەشی هونەریی و ئەدەبی دا لەتەک پێشمەرگایەتی سەنگەردا دەگێڕێ! دەنگبێژی ڕادیۆی دەنگی کوردستان بووە.
پێشمەرگەیەکی وتارنووس و شاعیر و ئەدیب بوو!! بە باوەڕ و قەڵەم و چەکەکەی بۆ گەلەکەی لە خەباتدا بووە..بەم هەموو وزە و خۆشەویشتی عەشقەوە بۆ کوردستانێکی سەربەخۆ تێدەکۆشا…
لە دوا ساڵەکانی تەمەنیدا بووە ئەندامی پارتی ئازادی کوردستان و دروشمی سەربەخۆیی کوردستانی کردە مەشخەڵی دەستی و خستییە سەروو هەموو دروشمەکانی ترەوە و بە گیان و باوەڕ و جەستەی کوردایەتییەوە لە سەنگەری سەختدا بۆ نەتەوە و خاکەکەی لە خەباتدا بوو..
مەرگی کاک پۆڵا شۆکێکی گەورە بوو، ئەو هێشتا زۆری مابووی درێژە بە خزمەتەکانی بدات!.. گەلێ هیوا و خەونی خستبووە ئەجێندای ژیانییەوە…
مەرگی کاکە پۆڵا بە ئازار و سوێیە و خەرمانی یادەوەرییەکانی تایبەتن کە هەرگیز لە بیر ناچنەوە..
من گفتم بە خۆم داوە و پابەند دەبم بەو سۆزەکەمەوە بۆ ڕەوانشاد کاکە پۆڵا و هەر چرکەساتێ دیوانەکەیم بەرچنگ بکەوێ، ئەو ئاواتەی دەهێنمە دی و حەزی خۆشم بەجێ دێنم!…
لێرەداکۆتایی بەم چەند وشەیە دێنم و هاوخەمی خۆم بۆ بنەماڵە و دۆستانی دەردەبڕم!.. سەرەخۆشی لە هونەر و ئەدەب و باوەڕی کوردایەتیش دەکەم، کەوا دڵڕەقانە و لەناوادەدا ڕۆڵەیەکی بەئەمەک و دڵسۆزی خۆیان لەدەست چوو!..
لە پێناو خاک و خەڵک و نیشتمانم
بە شانازی دەدەم گیان و ژیانم
قەسەم بەخوا ئیرادەم چەشنی پۆڵاس
نییە یەک زەڕرە باکی دوژمنانم
پۆڵا ــ ستۆکهۆڵم ــ ٢٠٢١،١٢،١٩
ڕەوانت شاد کاکە پۆڵا ..
بنوو …ڕۆڵە بێ دەوڵەتەکە لە نامۆیی و دوور لە ئامێزی ئەو نیشتمانەی بۆ ژیایت و بۆی تێکۆشایت و بۆی مردیت..
بنووووووووووو… ئیتر بە ئارامی ، زۆر نابات یەکێکمان مژدەی ڕزگاری و سەربەخۆیی کوردستانت بۆ دەهێنین بۆۆۆۆۆۆۆۆ……….دیداری داهاتوومان، تێهەڵچوونەوە و بونیاتنانەوەی وڵاتە کاولکراوەکەمان
بۆ ئازادی و بۆ یەکسانی لە کوردستان دا..
هەمیشە سڵاو لە ناو و یادگارەکانت!!…
