ناوەندی ڕەوەندی کوردستانی لە ڤیەنا لەگەڵ یانەی وەرزشی کورد ڤین کۆبوونەوە و لە میانەی کۆبوونەوەکەشدا، ئامانجە نەتەوەییەکانی ناوەند بۆ یانەکە روون کرانەوە و، ئەوانیش لە پێناو کاری هاوبەشی نەوەیی پەیوەندیان بە ناوەندەکەوە کرد و، خۆشحاڵ بوون، کە لە ژێر چەتری ناوەندی ڕەوەندی کوردستانیدا کار و چالاکییەکانیان ئەنجام بدەن.
ئەمڕۆ لە ڤیەنا شاندێکی ناوەندی ڕەوەندی کوردستانى، کە پێکهاتبوون لە نزار موسا بەرپرسی ناوەندەکە و، نوێنەری نەمسا لە کۆنفدراسیۆنی ڕەوەندی کوردستانی ئەفشین ئەقدەسی، لەگەڵ شاندێکی بەڕێوەبەرایەتی یانەی کورد ڤین بۆ وەرزش و تۆپی پێ کۆبوونەوە و، باسیان لە دۆخی یانەکە و ڕێگاکانی پشتگیریکردنی یانەکە و میکانیزمەکانی هەماهەنگی و کاری هاوبەش کرد، لەسەر میکانیزمی گونجاو بۆ ئەو پرسە ڕێککەوتن کرا و، ئەمەش لەنێو ئەو چالاکییانەدایە کە ئامانجیان ڕێکخستن و پشتگیریکردنی ناوەندی ڕەوەندی کوردستانیە بۆ ڕەوەندی کوردی لە نەمسا، هەروەها بۆ دەوڵەمەندکردن و بەشداریکردن لە ناوەندی ڕەوەندی کوردستانی لە نەمسا.
جێگەی سەرنجە، دواتر هەماهەنگی لەگەڵ باقی چالاکییە کوردییەکان دەکرێت، ئەوەش بەمەبەستی هەماهەنگی هاوبەش و ڕێکخستنی ڕەوەندی کوردی بۆ خزمەتکردن بە کورد و کوردستان، بۆ ئەو مەبەستەش یانەی کورد ڤین بە فەرمی پەیوەندیان بە ناوەندی ڕەوەندی کوردستانیەوە کرد.
