بەسەرپەرشتی خاتوو سازان گورون، کۆبوونەوەی بەشی ئافرەتان و لاوانی کۆنفدراسیۆنی ڕەوەندی کوردستانی ئەنجامدرا، کە تێیدا بە وردی باس لەوەکرا هەردوو بەشەکە بە جۆرێکی ئەکتیڤتر بۆ ئەمساڵ کاروچالاکییەکانی خۆیان ئەنجام بدەن.
رۆژی شەممە، رێککەوتی 21.01.2023 و لە بەرلینی پایتەختی وڵاتی ئەڵمانیا، دوابەدوای کۆبوونەوەی بەرفراوانی کۆمیتەی گشتی، بەشی ئافرەتان و بەشی لاوانیش بەسەرپەرشتی بەرپرسی بەشەکە، خاتوو سازان گورون، کۆبوونەوەی خۆیان ئەنجامدا و، ئەم کۆبوونەوەیەش تایبەت بوو بە ناوەندەکانی ڕەوەندی کوردستانی ئەڵمانیا و هەندێک وڵاتی دیکەی ئەوروپا.
لەو کۆبوونەوەیەدا بەوردی باس لەوەکرا، کە ئەو دوو بەشە بەجۆرێکی دیکە و بەشێوەیەکی ئەکتیڤتر لەمساڵدا کارەکانی خۆیان ئەنجام بدەن، کە بۆ ساڵی ٢٠٢٣ بەرنامە و پڕۆژەی تایبەتیان هەبێت و چالاکی جۆراوجۆر ئەنجام بدەن، ئەوەش بەهاوکاری ناوەندەکان.
جێی باسە، بڕیاری ئەوەش درا، کە لە ئایندەیەکی نزیکدا، کۆبوونەوەیەکی فراوان بۆ ئەندامانی هەردوو بەشەکە لە ناوەندەکانی دیکە ئەنجام بدرێت .
