ئاشتی گەرمیانی .. زێڤن بیرخن . هۆلەندا
بە سەرپەرشتی سەرۆکی کۆمەڵەی کوردی مۆردایک، دەستەی کارگێڕی کۆمەڵەکە بە مەبەستی دانانی بەرنامە بۆ ئەنجامدانی چالاکییەکانیان لە ساڵی ٢٠٢٤ کۆبوونەوە و چەندین بیرۆکەیان تاوتوێکرد.
ڕۆژی یەکشەممە ڕێککەوتی ٦ / ٨ / ٢٠٢٣ بە ئامادەبوونی سەرۆك و دەستەی کارگێڕی کۆمەڵەی کوردی موردایك، کۆبوونەوەی ساڵانەی بەرنامە و پلانی ساڵی ٢٠٢٤ ی خستە نێو ئەجیندای کار و چالاکییەکانییەوە بۆ ساڵی داهاتوو، کە لەتیف عومەر نووسەر و شاعیر، وەک سەرۆکی کۆمەڵەی کوردی موردایك، و دەستەی کارگێڕی و بەڕێوەبردن هەریەك لە ئاشتی گەرمیانی ، خۆشی بانەیی ، هیواعەلی ، بژار حەمدی ، کۆنی ڤەن ئاکن ، شیرین جەباری و لانۆ لەتیف، ئامادەی کۆبوونەوەکە بوون.
سەرەتای کۆبوونەوەکە باس لە چالاکییەکانی ساڵی ٢٠٢٣ کرا و، باسی ئەو چەند مانگەیان کرد کە لە پلانی ئەمساڵدا هەیە جێبەجێ بکرێت، و بۆ پلانی ساڵی داهاتوو کە دەبێت پێشکەشی شارەوانی موردایک بکرێت، بریتی بوون لەو چالاکیانەی کە سەری ساڵ و ڤالانتاین و ٢١ ی نەورۆز و، بۆنە نەتەوەییەکان و پێشانگای گشتی نێودەوڵەتی و سیمینار و ڕۆژانی منداڵان و، زۆر بۆنەی دیکە خرانە بەر باس و گفتوگۆکردن، هاوکات پێشانگای گشتی هونەرمەندانی کورد و وڵاتانی ئەوروپی کە ساڵانە لەلایەن کۆمەڵەی کوردی موردایکەوە ئەنجام دەدرێت، پلانی بۆ دانرا کە ساڵێکی تر ئامادەکاری بۆ بکرێت .
کۆمەڵەی کوردی موردایك، وەک ڕێکخراوێکی کەلتووری ڕۆشنبیری، لە ساڵی ٢٠٠٥ وە بەردەوامە لە چالاکی هونەری و کەلتووری و ڕۆشنبیری، لە سنووری شارەوانی موردایك و نێو هۆڵەندا. لە هەمانکاتدا کۆمەڵە یاری و چەند کارێك ئەنجام دەدەن، لەوانە کاری وێنەکێشان و یاری وەرزش و گۆرانی وتن، یا مەلەوانی، یان ڕاکردن و زۆر یاری تر.
جێی باسە، لە ڕێگای ئەم چالاکیانەوە مەبەست لە کۆکردنەوەی ڕەوەندی کوردستانی و تێکەڵ بوون لە گەڵ کۆمەڵگا و چالاکییەکانی هۆڵەندی بۆ زمان و کەلتوورو ڕۆشنبیری و ئاڵوگۆڕی فەرهەنگی کەلتوورییە .
