ڕۆژی دووشەممە ڕێکەوتی ١٣ی ١١ی ٢٠٢٣ شفا بارزانی سەرپەرشتیکاری گشتی ڕەوەندی کوردستانی و شاندی هاوڕێی سەردانی پەرلەمانی نەمسا و سەرۆکایەتی شارەوانی گەورەی ڤییەنایان کرد.
سەرپەرشتیاری گشتی ڕەوەندی کوردستانی و شاندی هاوڕێی لە پەرلەمانی نەمسا لە لایەن پەرلەمانتار (پئترا بایەر) کە لە هەمانکاتدا وتەبێژی سیاسەتی دەرەوەی پارتی سوسیال دیموکراتی دەسەڵاتداری نەمساشە. پێشوازی لێکرا و لە دیدارێکی دۆستانەدا باس لە گرنگی دامەزراندنی کۆنفدراسیۆنێکی بەهێز بۆ کوردستانیانی دیاسپۆرا کرا.
پاشان سەرپەرشتیکاری گشتی ڕەوەندی کوردستانی کورتەیەکی لە بەرنامە و ئامانجەکانی کۆنفدراسیۆنی ڕەوەندی کوردستانی باس کرد، و وتی:« ئامانجمان یەکخستنی کوردانی دیاسپۆرا و گرنگیدانە بە زیندوو هێشتنەوەی زمان و کلتوری کوردستانی، و لە هەمان کاتیشدا هانی کوردستانیان دەدەین دووربن لە بیری توندتیژ و ئاینی و گروپە تیرۆرستییەکان. پشتگیری لاوان و گەنجانمان دەکەین بۆ ئەوەی لە کایە ئەکادیمی و سیاسی و کۆمەڵایەتییەکانی وڵاتانی دیاسپۆرا بچنە پێشەوە و جێی خۆیان بکەنەوە.»
هەر هەمان ڕۆژ سەرپەرشتیکاری گشتی ڕەوەندی کوردستانی و شاندی هاوڕێی سەردانی سەرۆکایەتی گەورە شارەوانی ڤییەنایان کرد، لە دانیشتنێکدا لەگەڵ (نینا ئەبراهام) ئەندام پەرلەمانی ڤییەناو ئەندامی شارەوانی و (چەپەر حاجۆ) باس لە کاروچالاکییەکان ڕەوەندی کوردستانی و ئامانجەکانی کرا.
ئەوەی شایانی باسە لە شارەوانی ئامادەیی خۆیان دەربڕی بۆ کردنەوەی دەرگاکانی باڵاخانەی شارەوانییەکەیان بۆ کۆنفدراسیۆنی ڕەوەندی کوردستانی بۆ ئەوەی چالاکییەکانی تێدا ئەنجامبدات.
