ئەمڕۆ چوارشەممە ڕێکەوتی 17.04.2024، شاندێکی هاوبەشی ناوەندی ڕەوەندی کوردستانی-نەرویج و فدراسیۆنی ژنانی دیاسپورای کوردستانی، لەگەڵ نەتەوەی سامی کۆبوونەوە.
کۆبوونەوەکە لە ناوەندی سامییەکان، کە نوێنەرایەتی پەرلەمانی سامییەکانی نەرویج دەکەن لە ئۆسلۆ بەڕێوەچوو، وێڕای ئاڵ و گۆڕی بیر و بۆچوون و ناسینی زیاتر لە سەر مێژوو و کولتووری نەتەوەی سامی و نەتەوەی کورد، هەردوولا جەختیان لە هاوکاری زیاتری بوارە جیاوازەکان کردەوە، بەتایبەت کولتوور و بواری ڕۆشنبیری.
گرینگی ئەم چاوپێکەوتنە لەوەدایە، کە ئەمە یەکەمین پەیوەندی نێوان نەتەوە بێ دەوڵەتەکانی سامی و کوردە، هاوکات هەردوو لا بەو چاوپێکەوتنە زۆر خۆشحاڵ بوون.
شیاوی ئاماژەیە نەتەوەی سامی وەکوو نەتەوەی کورد بە سەر چوار وڵاتدا دابەش کراون و ئەو چوار وڵاتەش بریتین لە نەرویج، سویید، فینلاند و ڕوسیا. لە نەرویجدا خاوەنی پەرلەمانی خۆیانن و لە باکووری ئەو وڵاتەدا دەژین و ناوەندی سامییەکان لە ئۆسلۆ نوێنەرایەتی پەرلەمانی سامییەکان دەکات.
