ناوەندی ڕەوەندی کورد لە دەرەوە پرسە و سەرەخۆشی ناوەندەکەیان ئاڕاستەی بنەماڵەی دکتۆر جەلیل ئازید دەکەن و دەڵێن، کە لە دەستدانی ناوبراو خەسارەتێکی گەورە بەر هونەری کورد دەکەوێت، کە ناوبراو تێیدا پسپۆڕی بواری میوزیک بووە.
دەقی پرسەنامەکە:
بۆ بنەماڵەی بەڕێز و خۆشەویستی دکتۆر جەلیل ئازید
بە داخ و نیگەرانی و دڵێکی پڕ لە غەمگین، هەواڵی کۆچی دوایی برای خۆشەویست و بەڕێزمان، دکتۆر جەلیل ئازیدمان لە وڵاتی سوید پێگەیشت، دکتۆر جەلیل وێڕای پسپۆڕیەکەی بۆ هونەری کوردی، خزمەتێکی بەرچاوی پێشکەشکرد و بەردەوام بوو، هەروەها زۆر هیواو ئومێد و پڕۆژەی گەورەتری لە هەگبەدا بوو، بە داخەوە نەخۆشی ڕێگر بوو لە ئەنەنجامدانیان، هاوکات بە یەکێ لەو مرۆڤە سەرکەوتووانە دێتە ژماردن، کە ژیانی خۆی و زانستەکەی بە ماندووبوون و شەونخوونی بنیاد نا و، هەمیشە لە خەمی پێشخستنی میوزیکی کوردی و پێگەیاندنی هونەرمەندانی کورد بوو، بەردەوام بە ورەی بەرزەوە ململانێی لەگەڵ نەخۆشییەکەی دەکرد، بەو هیوایەی زانیاری و زانستەکانی لە ڕێی هونەردا زیاتر بخاتە گەڕ، بۆیە لە دەستدانی خەسارەتێکی گەورەیە بۆ هونەری کوردی.
پرسەو سەرەخۆشیمان بە تەواوی ماڵبات و خوشک و براکانی بنەماڵەی بەڕێزی ئازید ڕادەگەیەنین، لە خوای گەورە داواکارین جێی بەهەشت بێ و، سەبووری و ئارامیتان پێ ببەخشێت.
انا للە وانا الیە راجعون
ناوەندی ڕەوەندی کورد لە دەرەوە
26ی8ی2021
