ناوەندی ڕەوەندی کورد لە دەرەوە، بە بۆنەی رۆژی ئاڵای کوردستان، پەیامێکی کردەوە، کە تێیدا هاتووە، بە بۆنەی رۆژی ئاڵای پیرۆزی کوردستان، گەرمترین پیرۆزبایی لە هەموو کوردستانیانی نێوخۆ و دەرەوە دەکەن، هاوکات دەشڵێن، لەم رۆژە پیرۆزەدا دەستی دایکانی شەهید و چاوی منداڵانی شەهید ماچ دەکەین.
بە بۆنەی رۆژی ئاڵای پیرۆزی کوردستان، گەرمترین و جوانترین پیرۆزبایی لە هەموو کوردستانیانی نێوخۆ و دەرەوە دەکەین، ئاڵاکەمان سیمبولی قوربانیدان و گیان بەختکردن و سەرفرازیی هەمیشەییە.
ناوەندی ڕەوەندی کورد لە دەرەوە و لە سۆنگەی خۆشەویستی و ئینتیما بۆ ئاڵاکەمان، کە بەری رەنج و خەبات و تێکۆشان و قوربانیدانی خەڵکی کوردستانە، جەخت لەوە دەکەینەوە کە کورد و کوردستان لە هەموو کاتێک زیاتر پێویستیی بە یەکڕیزی کوردانیت نێوخۆیی و کوردانی دەرەوە هەیە، کە گیانی برایەتی و لێکتێگەیشتن و لێبووردەیی و کاری پێکەوەیی لە پێناو مافەکانمان ئەنجام بدەین، پەرتەوازەیی دەبێتە هۆی هۆی بە فیڕۆدانی بەرهەمی خوێنی شەهیدان و ئەنفالكراوان و کیمیاباران، کە بوونە قوربانی لە پێناو مافە نەتەوەییەکانمان.
هەر لەم ڕۆژە پیرۆزەدا، دەستی دایکانی شەهید و چاوی منداڵانی شەهید ماچ دەکەین، خوازیارین دایكان رۆڵەکانیان بە گیانێکی نیشتمانپەروەری پیرۆزییە نەتەوەییەکان پەروەردە بکەن.
ناوەندی ڕەوەندی کورد لە دەرەوە
17ی12ی2021
