وەزیری دەرەوەی لیتوانیا، گابریلیوس لاندسبێرگیس، ئەمڕۆ یەکشەممە، ستایشی عێراقی کرد، کە گەشتەکانی بۆ بیلاروس راگرتووە، بۆ ئەوەی لێشاوی پەنابەرە نایاساییەکان بۆ ئەوروپا نەمێنێت.
لاندسبێرگیس، لە کۆنگرەیەکی ڕۆژنامەوانیدا لەگەڵ فواد حوسێن هاوتا عێراقییەکەی لە بەغدا رایگەیاند، هیوادارە هەماهەنگی لە نێوان لیتوانیا و عێراق هەبێت بۆ دۆزینەوەی چارەیەک بۆ تراژیدیای کۆچکردن، بە بەهێزکردنی متمانە لە نێوان هەردوو وڵات
ئاماژەیشی بەوەدا، کە عێراق یەکەم وڵات بووە کە گەشتی ئاسمانی بۆ بیلاروس راگرتووە، وە عێراقیشی بە مۆدێلێکی نایاب بۆ مامەڵەکردن و درووستکردنی متمانە وێناکرد،
فواد حوسێن وەزیری دەرەوەی عێراق لە کۆنگرەکەدا رایگەیاند: ئەوان بەردەوامن لە درووستکردن و پەرەپێدانی پەیوەندییە دیبلۆماسییەکانی نێوان هەردوو وڵات و، سوپاسی وەزیری دەرەوەی لیتوانیشی کرد، کە رۆڵی گەورەی لە یارمەتیدانی عێراق لە بوارە جیاجیاکاندا هەبووە.
ئەوەشی خستەڕوو، هەوڵێکی زۆریان داوە بۆ لابردنی عێراق لە لیستی وڵاتە پڕ مەترسییەکان، ئەوەش لە بابەتی تیرۆر و پارە شوشتنەوەدا، هاوکات ناوی عێراق لەو لیستەشدا سڕاوەتەوە، ئەوەشی بە سەرکەوتنێکی دیپلۆماسییەتی عێراق وێنا کرد.
لەسەر بەرنامەی سەردانەکەی وەزیری دەرەوەی لیتوانیا، وەزیری دەرەوەی عێراق، روونیکردەوە، بەرنامەکەی چڕوپڕە، وە لە بەغدا لەگەڵ مستەفا کازمی سەرۆکوەزیران کۆدەبێتەوە و، سەردانی هەولێر دەکات، بۆ ئەوەی لەگەڵ بەرپرسان و سەرکردەکانی هەرێمی کوردستان کۆببێتەوە.
