لە میانەی ئۆپەراسیۆنێكی هاوبەشی هێزەكانی ئاسایشی بەڕێوەبەری خۆسەر و هاوپەیمانی نێودەوڵەتی نزیك شاری حەسەكەی رۆژئاوای كوردستان، 27 كەس بە تۆمەتی ئەندامبوون و هاوكاریكردنی رێخكراوی تیرۆریستی داعش دەستگیركران.
بە پێی راگەیاندنی ئاسایشی رۆژئاوای كوردستان، ئۆپەراسیۆنێکی هاوبەش لەگەڵ هاوپەیمانی نێودەوڵەتی دژی داعش، لە هەردوو گوندی عابد و فەلاحەی سەر بە شاری حەسەكە ئەنجام دراوە و، لە ئەنجامدا تواندراوە 27 کەس بە تۆمەتی ئەندامبوون و هاوکاریکردنی داعش دەستگیر بکەن، بەڵگەش لەسەر دەستگیركراوان هەن، كە هاوكارییان پێشكەش بە رێكخراوی تیرۆریستی داعش كردووە بۆ جێبەجێكردنی چەند پلانێكی تیرۆریستی، هەروەها چەندین چەك و تەقەمەنیش لە لای هەندێكیان دەستیان بەسەردا گیراوە.
شایەنی باسە، رۆژی چوارشەممەی رابردوو، هێزەكانی سووریای دیموكرات، كوشتنی سەركردەیەكی داعشی لە پارێزگای دێرەزووی باكووری رۆژهەڵاتی سووریایان راگەیاند.
