ئافرەتێکی چالاکوانی کوردی خەڵکی سنە لە لایەن هێزە ئەمنییەکانی کۆماری ئیسلامیی ئێرانەوە دەستگیرکرا و بۆ شوێنێکی نادیار گوازرایەوە.
بە گوێرەی هەواڵی رێکخراوی مافی مرۆڤی هەنگاو، بەرەبەیانی ڕۆژی شەممە 23ی ئۆکتۆبەری 2021، هێزە ئەمنییەکانی سنە، هەڵیانکوتاوەتە سەر ماڵی مریەم سادقی چالاکوانی بواری مافەکانی ئافرەتان و ئەندامی کۆمیتەی هەماهەنگی بە مەبەستی هاوکاری کردن بۆ سازکردنی ڕێکخراوە کرێکارییەکان و، دەستگیریان کردووە.
بە گوتەی سەرچاوەیەکی ئاگادار، هێزە ئەمنییەکان بە بێ پیشاندانی بەڵگەی یاسایی هەڵیانکوتاوەتە سەر ماڵی مریەم سادقی و دواتر ماڵەکەشیان پشکنیوە.
هەتا کاتی بڵاوکردنوەی ئەم هەواڵە، هیچ زانیارییەک لەسەر هۆکاری دەستگیر کران و ئەو تۆمەتانەی، کە خراونەتە پاڵ مریەم سادقی، هاوکات چارەنووس و شوێنی ڕاگیرانی ناوبراو لە بەر دەستدا نییە.
جێگای ئاماژەیە، کە مریەم سادقی ساڵی 2018ش، جارێکی دیکە لە لایەن دادگای شۆڕشی سنەوە بانگ کرابوو و لێپەرسینەوەی لەگەڵ کرابوو.
