سەرۆکی بەشی ئۆپەراسیۆنە نەتەوەییەکانی پۆلیسی سوید NOA، جۆهان ئۆلسۆن، دیاردەی تەقەکردنەکانی سوید بە مێژوویی و مەترسی وێنا دەکات.
لە چاوپێکەوتنێکیدا لەگەڵ ڕادیۆ ئیکۆت داوای زیادکردنی سەرچاوە و دەستەڵاتەکانی پۆلیس کرد، بەو پێەی ژمارەی لێدانە کوشندەکانی ساڵی ڕابردوو لە سوید گەیشتە تۆمارێکی بەرز.
بە گوتەی پۆلیس، جگە لە توندوتیژی چەتەکان، تاوانباران دزە دەکەنە دەزگا گشتییەکانیش.
ناوبراو ڕوونیکردەوە کە زۆرجار بەدواداچوونی تاوانەکان قورسە، چونکە تاوانباران شوێنەواری گرینگی کردەوەکانیان بەجێناهێڵن، هاوکات ڕزگاربووانیش دەترسن، کە قسە بۆ دادگاکان بکەن.
