لیژنەی ئەمەریکی بۆ ئازادییە ئاینییەکان لە ئیدارەی خۆسەری ڕۆژئاوا ڕایگەیاند، بوونی سوپای تورکیایان لە ڕۆژئاوا ڕەتکردووەتەوە و، داواشیان کردووە خاکی وڵاتەکە بەجێبهێڵێت، ئەمەش وەك كاردانەوەیەك بەرانبەر هێرش و بۆردوومانەكانی توركیا بۆ سەر ڕۆژئاوا و كەوتنەوەی قوربانی.
نادین مایینزا، جێگری سه‌رۆكی لیژنه‌ی ئه‌مەریكی بۆ ئازادییه ئاینییه نێوده‌وڵه‌تییه‌كان، لە کۆنگرەیەکی ڕۆژنامەوانیدا ڕایگەیاند، ئه‌مە‌ریكا داوای له توركیا كردووه به گوێرەی نه‌خشه‌ڕێگایه‌ك ناوچه‌كانی رۆژئاوای كوردستان جێبهێڵێت.
ئاماژەی بەوەشکردووە، له‌و ڕاپۆرته‌ی له لایه‌ن لیژنه‌كه‌یانه‌وه ئاماده‌یان كردووه، دەرکەوتووە توركیا له‌و شوێنانه‌ی داگیریكردوون، به‌رانبه‌ر به پێكهاتە ئاینییه‌كانی ناوچه‌كه پێشێلكاری ئه‌نجام ده‌دات، تاوانیش به‌رانبه‌ر به كریستیان و ئێزدی و كورد دەکات، به تایبه‌ت به‌رانبه‌ر به ئافرەتان.
قسەکانی جێگری سه‌رۆكی لیژنه‌ی ئه‌مەریكی بۆ ئازادییه ئاینییه‌کان، دوای بۆردوومانێکی تورکیا بۆسەر کۆبانێ هات و، کە زۆر نیگه‌ران بووە به چه‌ند کاتژمێرێک دوای هاتنی هه‌واڵی ئه‌وه‌ی پێگه‌یشت، چه‌ند شوێنێكی كوبانێ ڕووبه‌ڕووی بۆمباران بوونه‌ته‌وه و، هاووڵاتییه‌كی سڤیل شه‌هیدبووه و 11 کەسی دیکەش برینداربوون، زۆریش به‌وه نیگه‌ران بووە کە منداڵێكی چوارساڵان قاچێكی له ده‌ستداوه.
هاوکات عه‌بدولكه‌ریم عومه‌ر، هاوسه‌رۆكی فه‌رمانگه‌ی په‌یوه‌ندییه‌كانی ده‌ره‌وه‌ی به‌ڕێوه‌به‌رێتی خۆسه‌ر، لە کۆنگرە ڕۆژنامەوانییەکەدا ڕایگەیاند، له گفتوگۆكه‌یاندا چه‌ند بابه‌تێكیان باسكرد، به تایبه‌ت پێشێلكارییه‌كانی توركیا بەرانبەر به ناوچه‌كه و تێكدانی سه‌قامگیری تێیدا، به هه‌مان شێوه باسیان له كاریگه‌ری داخستنی ده‌وازه‌كان له‌سه‌ر ئابووری ناوچه‌كه كردووە، كه بووه‌ته هۆی ئه‌وه‌ی ژینگه‌یه‌كی له‌بار بۆ گه‌ڕانه‌وه‌ی ڕێكخراوی داعش بخوڵقێنێت”.
