سەرۆکی دەزگای لوتکە رایگەیاند، لە رۆژانی 27 و 29ی ئەم مانگە تەرمی نۆ کۆچبەری کوردی خنکاو دەگەڕێندرێنەوە هەرێمی کوردستان، کە لە هەشت ئافرەت و پیاوێک پێکهاتوون.
ئاری جەلال، سەرۆکی دەزگای لوتکە بڵاویکردوەتەوە، وابڕیارە تەرمی چوار لە قوربانیانی دەریای ئیجە لە ڕێککەوتی 27/1/2022 لە ئەسینای پایتەختی یۆنان بەڕی بکرێن و، لە ئێوارەی 29/1/2022 بگەنە فڕۆکەخانەی نێودەوڵەتی هەولێر و ڕادەستی کەسوکاریان بکرێنەوە.
ئەوەشی خستەڕوو تەرمی پێنج لە قوربانیانی ئەو ڕووداوەش لە گەشتی دووەمدا و، لە ڕێککەوتی 29/1/2022 لە ئەسینای پایتەختی یۆنان بەڕێدەکرێن و، ئێوارەی 1/2/2022 دەگەنە فڕۆکەخانەی نێودەوڵەتی هەولێر.
بە گوتەی سەرۆکی دەزگای لوتکە، قوربانییەکان پێکهاتوون لە هەشت ئافرەت و یەک پیاو، کە لە رووداوی ژێرئاوکەوتنی بەلەمەکەیان لە دەریای ئیجە، نزیک دوورگەی ئاتیکیپیرای یۆنان گیانیان لە دەستداوە، هاوکات تێچووی گەڕانەوەی تەرمەکان لەلایەن سەرۆکایەتی ئەنجومەنی وەزیرانی هەرێمی کوردستان دابینکراوە
