ناوەندی ڕەوەندی کورد لە دەرەوە، وێبنارێکی تایبەت سەبارەت بە پڕۆژەی خوێندنی ئەلیکترۆنی زمانی دایک، کە پڕۆژەی ناوەندەکە بوو، بۆ ئالان حەمەسەعید وەزیری پەروەردەی حکوومەتی هەرێمی کوردستان لە رێی بەرنامەی Zoom ساز دەکات.
کاتژمێر 7:30 خولەکی ئێوارەی شەممە بە کاتی ئەڵمانیا و، کاتژمێر 9:30 بە کاتی هەولێر، ناوەندی ڕەوەندی کورد لە دەرەوە، وێبنارێک بۆ ئالان حەمەسەعید وەزیری پەروەردەی حکوومەتی هەرێمی کوردستان لە رێی بەرنامەی Zoomەوە ساز دەکات، کە تایبەتە بە پڕۆژەی ناوەندەکە، ئەویش خوێندنی زمانی دایکە بۆ منداڵانی تاراوگە لە رێی ئۆنلاینەوە.
پڕۆژەی خوێندنی زمانی دایک، ساڵی رابردوو ناوەندی ڕەوەندی کورد دایە وەزارەتی پەروەردە و، لەلایەن ئالان حەمەسەعید وەزیری پەروەردەی حکوومەتی هەرێمی کوردستان، بە خۆشحاڵییەوە کاری بۆ کرا و بڕیاریشە لە رێککەوتی 6ی3ی ئەمساڵ بکەوێتە واری جێبەجێکردنەوە، کە لەسەر ئەرکی وەزارەت سێ مامۆستا بۆ هەردوو شێوەزاری سۆرانی و بادینی تەرخان کراون، هاوکات لەسەر ئەرکی ناوەندی ڕەوەندی کورد لە دەرەوە، مامۆستایەکی فێربوونی کوردی لاتینی تەرخان کراوە.
جێی باسە، ئەوەش دەرئەنجامی خەمخۆری ناوەندەکە و وەزارەتی پەروەردەیە، لە پێناو ئەوەی منداڵانی کوردی دانیشتووی وڵاتانی دیکە، بێ بەش نەبن لە نووسین و خوێندنەوەی زمانی دایک، وە لە کۆتاییشدا لەلایەن وەزارەتی پەروەردەی حکوومەتی هەرێمی کوردستانەوە، بڕوانامەی فەرمیی بە منداڵە بەشداربووەکان دەدرێت.
