بەبۆنەی پەنجاو دووەمین ساڵیادی ڕێککەوتننامەی یانزدەی ئازار سەرۆک بارزانی پەیامێکی بڵاوکردەوو و ڕایگەیاند : ڕێککەوتنی ئاداری ساڵی ١٩٧٠ دەسکەوتێکی گرنگی بزوتنەوەی ڕزگاریخوازی گەلی کوردستانە و بەڵگەیەکی ڕوونە لەسەرکەوتنی شۆرش و ئیرادەی ڕەوای گەلی کوردستان
لەدرێژەی ڕاگەیاندنەکەی سەرۆک بارزانی دەڵێت « ١١ ئادار لە ئەنجامی پێداگری و خۆڕاگریی گەلی كوردستان و شۆڕش، بە ڕابەرایەتیی جەنابی بارزانیی نەمر ڕژێمی عێراق ناچار كرا كە لە یازدەی ئاداری 1970ـدا بۆ یەكەم جار و بە شێوەیەكی فەرمی دان بە بەشێك لە مافەكانی گەلەكەماندا بنێت»
لەکۆتایی دا سەرۆک بارزانی جەخت لە
پەیامی ئاشتیخوازنە و پێکەوە ژیانی هەرێمی کوردستان دەکاتەوە،و لەهەر باردۆخێکدا لەژێر هەر گوشارێکدا گەلی کوردستان دەستبەرداری ئازادی و مافەڕەواکانی نابێت
ئەمەش دەقی پەیامەکەیە :-
پەیامی سەرۆك بارزانی بە بۆنەی پەنجا و دووەمین ساڵیادی ڕێككەوتننامەی یازدەی ئادار
بەناوی خودای بەخشندە و میهرەبان
زۆر بە بەرزی یادی پەنجا و دوو ساڵەی ڕێككەوتننامەی یازدەی ئادار دەكەینەوە كە دەستكەوتێكی گرنگی بزووتنەوەی ڕزگاریخوازی گەلی كوردستان بوو.
لە ئەنجامی پێداگری و خۆڕاگریی گەلی كوردستان و شۆڕش، بە ڕابەرایەتیی جەنابی بارزانیی نەمر ڕژێمی عێراق ناچار كرا كە لە یازدەی ئاداری 1970ـدا بۆ یەكەم جار و بە شێوەیەكی فەرمی دان بە بەشێك لە مافەكانی گەلەكەماندا بنێت.
یازدەی ئاداری 1970، بەڵگەیەكی ڕوونە لە سەركەوتنی شۆڕش و ئیرادەی ڕەوای گەلی كوردستان بەسەر نكۆلیكاریی ناحەزانی گەلی كوردستان و هەوڵەكانیان بۆ سڕینەوەی گەلەكەمان. ڕێككەوتننامەی یانزدەی ئازار بەرهەمی خەبات و قوربانیدانی پێشمەرگە و سەرجەم چین و توێژ و پێكهاتە ئایینی و نەتەوەییەكانی كوردستان بوو. ئەو خەباتەی لەپێناو بەرقەراربوونی پێكەوەژیان و شەراكەت و دادپەروەری و ئاشتیدا بەردەوام بوو و گەییشتە ئەنجام.
ڕاستە لەدوای ڕێككەوتنی یازدەی ئازاریش ڕژێمی عێراق ڕێگەی پەیمانشكێنی و ملهوڕی گرتەبەر بەڵام ئیرادەی گەلەكەمان بۆ بەردەوامی خەبات و خۆبەدەستەوەنەدان هەر بەردەوام بوو و، بووە هۆی بەدەستهاتنی دەستكەوتی گەورەتر.
لە ساڵیادی ڕێككەوتننامەی یازدەی ئازاردا جەخت لە پەیامی ئاشتیخوازانە و پێكەوەژیانی گەلی كوردستان دەكەینەوە و ئەوەش دووپات دەكەینەوە كە لە هەر بارودۆخ و لەژێر هەر گوشارێكدا ئیرادەی گەلی كوردستان ناشكێت و، كوردستان دەستبەرداری ئازادی و مافە ڕەواكانی نابێت.
مسعود بارزانی
11ی ئادار 2022
