کوڕە کوردێکی تەمەن 15 ساڵی خەڵکی بۆکان، لەلایەن هێزە ئەمنییەکانی شارەکەوە دەستگیرکراوە و، بە سەختی ئازار و ئەشکەنجە دراوە.
بە گوێرەی هەواڵی ڕێکخراوی مافی مرۆڤی هەنگاو، هێزەکانی ئیدارەی ئیتڵاعاتی بۆکان، ئاریا یوسفی مێرمنداڵی تەمەن 15 ساڵ و، کوڕی فاتمە داوەند بەندکراوی سیاسی پێشوویان دەستگیر کردووە.
هێزەکانی ئیدارەی ئیتڵاعات، ئەو مێرمنداڵە تەمەن 15 ساڵەیان لە یەکێ لە شوێنە گشتییەکانی بۆکان دەستگیر کردووە و، دواتر داویانەتە بەر لێدان و ئەشکەنجە و ئازار و، دەستیشیان بەسەر مۆبایلەکەشیدا گرتووە.
یەکێ لە نزیکانی بنەماڵەی یوسفی بە رێکخراوەکەی ڕاگەیاندووە، کە ئاریا یوسفی نێردراوەتە لقی یەکی بازپۆرسی دادگای شۆڕشی بۆکان، ئەوەش بە پڕوپاگەندەکردن دژی نیزام تۆمەتبار کراوە.
ئەو سەرچاوە لە درێژەدا ڕایگەیاندووە، ئاریا یوسفی، بە توندی دراوەتە بەر لێدان و دەموچاوی ڕەش بووە و، دوای ئەوەی تۆمەتەکەی پێ ڕاگەیەنراوە، گوازراوەتەوە بۆ گرتووخانەی ناوەندی ئورمیە.
