بە بۆنەی هاتنەوەی جەژنی نەورۆز و سەری ساڵی كوردی (2722)، جڤاتی ئاشتی (بان) پیرۆزبایی خۆیان ئاڕاستەی یەكە یەكەی هاوڵاتیانی كورد لە هەر چوار پارچەی كوردستانى گەورە و هەموو كورد نەژادێك دەكەن، کە لەهەر شوێنێكی ئەم جیهانەدا دەژین، هەروەها پیرۆزبایی خۆیان لە تەواوی مرۆڤایەتی، بە تایبەتی ئەو گەل و نەتەوە و كۆمەڵگايانەی، كە دۆست و پشت و پەنای گەلی ستەمدیدەی كوردن، دەکەن.
دەقی پەیامەکە:
ئەم ڕۆژی ساڵی تازەیە نەورۆزە هاتەوە
جەژنێكی كۆنی كوردە بە خۆشی و بە هاتەوە
بە بۆنەی هاتنەوەی جەژنی نەورۆز و سەری ساڵی كوردی (2722)، ئێمە لە جڤاتی ئاشتی جوانترین و بەهادارترین پیرۆزبایی خۆمان ئاراستەی یەكە یەكەی هاوڵاتیانی كورد لە هەر چوار پارچەی كوردستانى گەورە و هەموو كوردنەژادێك دەكەین لە هەر شوێنێكی ئەم جیهانەدا بژین، هەروەها پیرۆزبایی خۆمان لە تەواوی مرۆڤایەتی دەكەین، بە تایبەتی ئەو گەل و نەتەوە و كۆمەڵگايانەی، كە دۆست و پشت و پەنای گەلی ستەمدیدەی كوردن و هەمیشە هەڵوێستی مرۆڤانە و ئاشتیخوازانەیان لە بەرامبەر گەلی كورد و دۆزە ڕەواكەی دەربڕیوە و پشتیوانیان لە بوون و مافەكانمان كردووە و لە دژی ئەو جەور و ستەمكاری و دەمارگیرییە ناسیۆنالیستیەدا وەستاونەتەوە كە لە لایەن دوژمنان و ناحەزانەوە لە دژی ئازادیخوازانی كورد پراكتیزە كراوە.
نەورۆز واتە هەڵاتنی ڕۆژێكی نوێ و كۆنترین جەژنە و لەناو گەلی كورد-دا سەرەتای هاتنى وەرزی بەهار و كۆتايی هاتنی سەرما و سۆڵەی زستانە و جێگایەكی بەرز و پیرۆزی هەیە و هەموو ساڵێك لەو ڕۆژەدا تەواوی گەلی كوردستان بە جلوبەرگی ئاڵ و واڵای كوردییەوە و یادی دەكەنەوە و ڕوو لە دەشت و دەری ڕازاروەی كوردستان دەكەن و بە ئاهەنگ و گۆرانی و ڕێوڕەسمی جۆراوجۆر پێشوازی لەم ڕۆژە پیرۆزە دەكەن و مەشخەڵی ئاگر دەكەنەوە، كە لە دێر زەمانەوە سیمبوڵی سەركەوتن و بەخشینی هیواكانی گەلی كورد بوو و بە جەژنێكی نیشتیمانی و نەتەوەیی لە مێژووی كورددا دادەنرێت.
نەورۆز و نوێبوونەوە هێمایە بۆ سەركەوتنی هێزی ئاشتی و ژیاندۆستی و پێكەوە ژیان و ڕابوونی خەڵكی خاوەن ماف و ستەملێكراو بەسەر هێزی تاریكی و شەڕخوازی و ستەمكاریدا، سەرەتای هەڵاتنی ڕۆژێكی نوێ و ژیانێكی نوێیە بۆ مرۆڤ و سروشت و نیشانەیەكە بۆ كۆتایی هاتنی نادادپەروەری و كۆنەپەرستی.
ئێمە لە جڤاتی ئاشتی (بان) بڕوامان وایە جەژنی نەورۆز پەیامی ئاشتی و ئاشتەوایی و خۆشەویستیە و لە میللەتی كوردەوە بۆ هەموو جیهانی ئاشتیخواز و ئازادیخواز و چاوگێكە بۆ ژیانەوەی ژیانی نوێ و بیری نوێ، لەبەر ئەوە پێویستە هەموو ساڵێك وەك نەریتێكی زیندوو دوور لە نەتەوەپەرستی و دەمارگیریی بە شێوەیەكی شكۆمەندانە یادی بكرێتەوە، لە دیوێكی تریشەوە نەورۆز میراتێكی دێرین و مێژوویی كوردستانە، ئەمەش ئەوە دەسەلمێنێت كە گەلی كورد یەكێكە لە كۆنترین گەلانی دونیا و توانیوەیەتی سەرەڕای هەموو فشارو بەرهەڵستیەكان بە زیندوویی و خۆڕاگری بمێنێتەوە، ئەمەش لە یەك ئامانجی باڵادا یەكدەگرێتەوە ئەویش حەزكردنی كوردە بە سەربەستی، سەربەستی بۆ مرۆڤ و سەربەستی بۆ سروشت و ژیانەوەی بەردەوام لە پێناو ژیانێكی ئارام و خۆشگوزەران بۆ مرۆڤایەتی.
لە كۆتاییدا پێویستە بە بەرزكردنەوەی مەشخەڵی نەورۆز ڕێگا سەختەكانی ژیانمان ڕۆشن بكەینەوە و بە ئامانج و ئاواتەكانی چەندین ساڵەی گەلەكەمان بگەین و ئاشتی و تەبایی و پێكەوە ژیان بەرقەرار بكەین و بە یادی نەورۆ ز و بەهار تۆوی تەبایی نیشتیمانی و ئاسودەیی و بەختەوەری بڕوێنین چونكە كورد گەلێكی ستەملێكراوە و هەڵهاتنی خۆری ئازادی و ژیانی یەكسانی و دادپەروەری دەوێت و نەفرەت لە شەڕ و دووبەرەكی دەكات..
دووبارە و چەند بارە هاتنەوەی جەژنی نەورۆز لە هەموو گەلی كورد و مرۆڤدۆستان و ئاشتیخوازانی جیهان پیرۆز بێت
جڤاتی ئاشتی سلێمانی
سلێمانی – 20/3/2022
