ئیرینا فێرشتشوک جێگری سەرۆکوەزیرانی ئۆکرانیا، داوا لە ئەنجومەنی ئاسایشی نەتەوە یەکگرتووەکان دەکا، کە دەست بەجێ کار بۆ ناوچەی دژە فڕین لە دەووروبەری وێستگەی ناوەکی چێرنۆبل بکەن.
فێرشتشوک، دەڵێ هێزەکانی ڕووسیا کار دەکەن بۆ “میلیتاریزەکردن” لە دەووروبەری وێستگەکە و، نموونەی ساڵی 1986 دێنێتەوە، کە بەهۆی زیانگەیاندن بەو وێستگەیە، خراپترین ڕووداوی ناوەکی جیهانی لێکەوتووەتەوە.
ئەو بەرپرسەی ئۆکرانیا، ئەوەشی خستۆتەڕوو، کە هێزەکانی ڕووسیا بڕێکی زۆر چەکی کۆن دەگوازنەوە، کە دەتوانێت زیان بە وێستگەکە بگەیەنێت.
فێرشتشوک لە هەژماری تەلیگرامەکەیدا نووسیویەتی: “لە چوارچێوەی سەلامەتی ناوەکیدا، کردەوە نابەرپرسیار و نا پرۆفیشناڵەکانی سەربازانی ڕووسیا، مەترسییەکی زۆر جدی بۆ ئۆکراینا نا، بەڵکو بۆ سەدان ملیۆن ئەوروپی دروست دەکات”.
جێی باسە، ڕووسیا بە بەردەوامی لە گواستنەوەی چەک بۆ ناوچە نزیکەکانی وێستگەکە، ئەو مەترسیانەی پشتگوێ خستووە و، پێشتریش ڕەتی کردەوە کە هێزەکانی لە ناو ئۆکرانیادا دەزگا ئەتۆمییەکان بخەنە مەترسییەوە.
