سەرۆک شارەوانی ماریوپۆڵ: 160 هەزار هاووڵاتی مەدەنی ژیانیان لە مەترسیدایە
سەرۆکی شارەوانی ماریوپۆڵ دەڵێت، دەبێ هەموو هاووڵاتیانی مەدەنی لە شارە گەمارۆدراوەکە بگوازرێنەوە و، ڕێیان پێبدرێ خۆیان بە دووربگرن لە کارەساتێکی مرۆیی.
سەرۆکی شارەوانی ماریوپۆڵ، ڤادیم بۆیچێنکۆ، رایگەیاند، کە هێشتا 160,000 هاووڵاتی مەدەنی لە شاری ماریوپۆڵی سەر دەریای ئازۆڤ بەبێ کارەبا و گەرمی ماونەتەوە، ئەوەش دوای چەند هەفتەیەک دێت لە بۆردومانەکانی ڕووسیا بۆ سەر شارەکە.
ئاماژەی بەوەشدا، کە 26 پاس چاوەڕێی گواستنەوەی هاووڵاتیان دەکەن لە شاری ماریوپۆڵ، بەڵام هێزەکانی ڕووسیا هێشتا ڕێکنەکەوتوون لەسەر ئەوەی ڕێڕەوێکی پارێزراوییان بۆ بکەنەوە.
بۆیچێنکۆ وتی: “بارودۆخی شارەکە هێشتا هەر سەختە، خەڵکەکە لە سەروو هێڵی کارەساتی مرۆییەوەن، دەبێت ماریوپۆڵ بە تەواوەتی چۆڵ بکرێت، فیدراسیۆنی ڕووسیا یاریمان لەگەڵدا دەکات، ئێمە لەناو دەستی داگیرکەرانداین”.
ماریوپۆڵ وەک خەڵاتێکی ستراتیژی سەیر دەکرێت بۆ ڕووسیا، تا وەک پردێکی لێبێت لە نێوان دوو هەرێمە جیاخوازەکانی ڕۆژهەڵاتی ئۆکرانیا و، نیمچە دوورگەی کریم، کە لە ساڵی 2014 دا ڕووسیا گرتییە خۆی.
