دوابەدوای خۆسووتاندنی بەندکراوێک لە بەندیخانەی ماکۆ و بڵاوبوونەوەی هەواڵەکە، کەمال درەفشی باوکی ئەو بەندکراوە، لەلایەن ئیدارەی ئیتڵاعاتەوە بانگکراوە و هەڕەشەی لێکراوە.
بەگوێرەی هەواڵی ڕێکخراوی مافی مرۆڤی هەنگاو، محەممەد درەفشی بەندکراوی تەمەن ٣٨ ساڵی خەڵکی ماکۆ، کە هەفتەی ڕابردوو بە نیشانەی ناڕەزایەتی دەربڕین ئاگری لە جەستەی خۆی بەردابوو و، بەهۆی ناجێگیربوونی باری تەندروستی بۆ نەخۆشخانەی خومەینی ئورمیە گوازرابووەوە، سەرلەنوێ گەڕێنراوەتەوە بۆ گرتووخانەی ناوەندی ماکۆ.
سەرچاوەیەکی نزیک لە بنەماڵەی درەفشی، بە رێکخراوەکەی ڕاگەیاندووە، کە بنەماڵەی درەفشی، هەتا ئێستا نەیانتوانیوە چاویان بە محەممەد بکەوێت و، ڕۆژی ڕابردووش بە نیشانەی ناڕەزایەتی دەربڕین چوونەتە گرتووخانەی ماکۆ، بەڵام بەرپرسی گرتووخانەکە رێی نەداوە، کە کوڕەکەیان ببینن و، وتوویەتی، کە گرتووخانە چارەسەری پێویستی بۆ دەکرێت.
ئەو سەرچاوەیە ئەوەشی وتووە، کە کەمال درەفشی باوکی محەممەد، ڕۆژی ڕابردوو لەلایەن ئیتڵاعاتی ماکۆوە بانگکراوە و، وێڕای لێپرسینەوە، هەڕەشەیان لێکردووە کە نابێت لەگەڵ هیچ میدیایەک قسە بکات و، دەبێت ئەوەی ئەو هەواڵەی بڵاو کردووەتەوە، پێیان بناسێنێت.
