پاسەوانانی سنووری بولگاریا 84 کۆچبەر بە زۆر جلوبەرگیان پێ دادەکەنن و دیپۆرتی تورکیایان دەکەنەوە
بەگوێرەی میدیاکانی تورکیا، پاسەوانەکانی سنووری بولگاریا دوای ئەوەی کۆچبەرەکانیان ناچارکرد کراسەکانیان دابکەنن و کەلوپەلە تایبەتەکانیان زەوتکردن، 84 کۆچبەریان بەرەو سنووری تورکیا دیپۆرت کردەوە.
سەرچاوەیەکی ئەمنی تورکیا ڕایگەیاند، کە هەندێک لەو 84 کۆچبەرە لە بولگاریاوە بە نیوە ڕووتی بۆ سنووری تورکیا گەڕاندۆتەوە و، کە پاسەوانەکانی سنووری بولگاریا بە زۆر ڕووتیان دەکەنەوە و دەیانگەڕێننەوە.
بەگوێرەی ئەو سەرچاوەیە، تیمەکانی جەندرمە لە باکووری ڕۆژئاوای تورکیا لە پارێزگای کەرکوکلەرێلی، لەکاتی ئێشکگرتنیاندا لە ناوچەی کۆفکازی نزیک سنووری بولگاریا، چاودێری هەبوونی کۆچبەرانی نایاسایی نیمچە ڕووتیان لە دارستانەکەی نزیک بولگاریا کردووە.
سەرچاوەکە ئەوەشی خستەڕوو، کۆچبەرەکان، ئەفغانی، مەغریبی، سوری و ئێرانیان تێدابووە، کە بە لەبەرکردنی چەند جانتایەکی پلاستیکی هەوڵیان داوە خۆیان لە سەرما بپارێزن.
میدیاکانی تورکیا ىلاویان کردووەتەوە، کە کۆچبەرەکان وتوویانە، لە ڕێگەی یۆنانەوە پەڕینەوە بۆ بولگاریا و پاشان لەلایەن پۆلیسی بولگاریاوە دەستگیرکراون و جل و بەرگیان لەبەر داکەندراون و هەندێ شتیشیان لە زەوتکردوون و دیپۆرتی سنووری تورکیایان کردوون.
