ئەمڕۆ سێشەممە، لەسەر داوای ئەمەریکا، پتر لە چل وڵات لە وڵاتانی یەکێتی ئەوروپا و هاوپەیمانەکان بە مەبەستی کۆکردنەوەی هاوکاری و، گەیاندنی چەکی قورس بۆ ئۆکرانیا کۆدەبنەوە، لەلایەکی دیکەوە سێرگی لاڤرۆڤ وەزیری دەرەوەی ڕوسیا ڕایگەیاند، گەیاندنی چەک بۆ ئۆکرانیا بەمانای ڕگەیاندنی شەڕە لەلایەن ناتۆ، ئەمەش زەمینەی جەنگی سێیەمی جیهانی نزیک دەکاتەوە.
زیاتر لە 40 وڵات لەسەر بانگهێشتی ئەمەریکا لە ئەڵمانیا کۆدەبنەوە بۆ کارکردن لەسەر بەهێزکردنی توانا سەربازییەکانی ئۆکرانیا، لۆید ئۆستن وەزیری بەرگری ئەمەریکا ڕایگەیاند، ئۆکرانیا دەتوانێت بەسەر ڕوسیادا سەرکەوێت، ئەگەر چەکی بەهێز و هێرشبەری هەبێت.
وەزیری بەرگری ئەمەریکا لە بنکەی ئاسمانی ڕامستینی ئەڵمانیا دوای سەردانەکەی بۆ کیێڤ، ئەمڕۆ هەوڵ دەدات پشتگیری زیاتر لە هاوکاری سەربازی بۆ ئۆکرانیا دابین بکات.
لەپێشاهاتێکی نوێ، ڕوسیا هۆشداری توندی لەبارەی گەیاندنی هاوکاری سەربازی بۆ ئۆکرانیا ڕاگەیاند، دوای ئەوەی وەزیرانی دەرەوە و بەرگری ئەمەریکا لە کیێڤ بەڵێنیاندا، کە هاوکاری زیاتری چەکی پێشکەوتوو بۆ ئۆکرانیا دابین بکەن.
سێرگی لاڤرۆڤ وەزیری دەرەوەی ڕووسیا لە چاوپێکەوتنێکیدا، کە دوێنێ دوو شەممە بڵاوکراوەتەوە، ڕایگەیاند: چەکە ڕۆژئاواییەکان کە بۆ ئۆکرانیاوە دابینکراوە، ئاماژەیەکن بۆ ئەوەی ناتۆ لە ڕاستیدا خەریکی شەڕی ڕوسیایە و، مۆسکۆش ئەو چەکانە وەک ڕاگەیاندنی شەڕی دژ بە ڕوسیا سەیر دەکات، ئەوەش زەمینەی جەنگی جیهانی سێیەم خۆش دەکات.
سۆران حەسەن
