ئاشتی گەرمیانی .. هۆڵەند
.. زۆر کەس تابلۆی گوڵ دروست دەکەن ، بەڵام وەکو گووڵەکانی من نین ..
.. ووڵاتی ئێمە . ووڵاتی نێرگزی گوڵە .. گوڵیش زمانێکی جوان و بێدەنگە.
هونەرمەندێکی شێوەکاری ڕۆژئاوای کوردستان عەبدول سەلام عەبدوڵا کەلە ڕۆژهەڵاتی شاری قامشلو ( ڕومیلان ) لەساڵی ١٩٦١ لەدایك بووە ، دەشتێکی ووشك و گردو هەردەو هەڵەت لە پانتایەک دەکات تا چاو بڕ بدات بەخۆی نە دارو نەگوڵ و نە سەوزایەکی پان و پۆڕ بەدی ناکەیت ، بەڵام حەزەکانی ژیان و گووڵ ئەوەندە زۆرن ، لەهەر حەزێك باخچەیەك و گوڵێک و جۆرێك و بەهارێکی دڵگیری تێدا جێگر بووە ، لەسەرەنج دانم بۆکارو چالاکی و بەرهەمە هونەریەکانی هونەرمەند عەبدول سەلام کەوتمەوە نێو خەیاڵ و مێژووی ڕێنناسی هونەری جیهانی ، چومەوە بۆ لای هونەرمەندانی وەکو میللە وسیزان وە ئەو هونەرمەندانەی کە ئێستاش لەئەوروپا سەرقاڵی تێکەڵ بوونن بە سروشت و دەیانەوێت گووڵ و جوانی و سروشت بناسن ، ئەو گوڵەی کە گوڵی هەموو کەسێك نی یە ، وە ئەو گوڵەی کە چاوی مرۆڤی بەستۆتەوە ، بێگومان لەم سەردەمە تەکنەلۆجیاو پێش کەوتن و گۆران کاری یە هاوچەرخانەدا هونەری مۆدرن و تۆپ هونەرو فەنتازیای هونەر هاتۆتە دونیاوە ، بەڵام هونەری ڕۆمانتیکی و ڕیالیستی جوانی سروشت گرنگی خۆی هەیە وە بەردەوامە وە زۆرێک لە لاوان و هونەرمەندانی لاو پەیدا بوون دەیانەوەێت بەکەڤاڵەکانیان پێش بڕکێ ی فۆتۆگراف و سروشت بکەن ، لەم کاتەشدا هونەرمەندێکی کورد عبدالسلام عبداللە وویستی ئەو پێشبڕکێیەیەتی لەگەڵ گوڵ و جیهانی گوڵ و سروشتەکەیدا ، ئەو لە جێگایەکی گەرم لەدایك بووە بەڵام دڵ وڕووح و جیهانی ئەو هەر بەهارە ، چ بەهارێك وە یان چ گوڵزارێک کە بۆنی کوردستان و چیاکانی کوردستانی لێوە دێت ، ئەگەر بچیتە عەفرین و چیا گردەڵەکانی عەفرین ، مەملەکەتی ماڵڤای هونەرمەند .. ئەو هەموو جوانی یە گوڵانە دەبینیت ، هونەرمەندیش لەوێ وە تەمەشای ڕواڵەتی سروشتەکەی دەکات ، بۆ گوڵەسوورەکان و سپی و ئەرخەوانی و مۆرو زەردو سەوزەکان شاهێدی تابلۆکانن .
هونەرمەند عبدالسلام عبداللە لە دیدارەکانیدا دەڵێت (( ووڵاتی ئێمە ووڵاتی نێرگز و گوڵە . گوڵیش زمانێکی جوان و بێ دەنگە ، چاوە چاوێتی بێتە دەنگ ، گوڵەکانی ووڵاتی من وەکو کراسەکەی دایکمە و ئەکەونە ناو ناوەخنی گوڵەکانەوە و ئەکەونە نێو گوڵەکانی خەڵکەوە ، خەڵك نانێك دەفرۆشێت بۆ ئەوەی گوڵێك بکڕێت )) . هونەرمەند دەڵێت : ژیانی رەش بینی و کارەساتە ناخۆشەکان لایەنی سۆزداری مرۆڤ بەرەو ناخۆشی دەبات ، کاتێك تابلۆکانی من دەبینیت دڵ خۆش دەبیت و کارەساتەکان کۆتاییان دێت . زۆر کەس گوڵ دروست دەکەن بەڵام وەکو گوڵی من نی یە ، ئەوانی من لە ووڵاتی خۆمدا دەبینم و تەماشایان دەکەم من شتی دووبارە دروست ناکەم ..
هونەرمەند عبدالسلام بە شێوەیەك تواوەتەوە لەنێو گوڵ و ڕەنگ و باخچەکاندا تەنها بۆنی گووڵ دەکات و لە نێو کاریزمای گوڵدا دەژیت ، هەربۆیە کارە هونەریەکانی لە ڕێچکەی خۆی دەرچوون و بوون بە نێو دەوڵەتی ماڵان لەهەموو جیهاندا ، بەتایبەتی کاتێك گەشت دەکات بۆ ئیتالیا و سویسرا ئەو جوانیانە دەخاتە نێو گەلەری و هۆڵەکانەوە ، دەیەوێت لەوێوە بڵێت من لە کوردستانەوە هاتووم و گوڵ و ڕەنگم هێناوە بۆتان ، ووڵاتی ئەو ڕۆژئاواو سوریایە ، هەر بۆیە جوانیەکانی ئەو ووڵاتە دەگوازێتەوە بۆ چاوی بینەرەکانی ، هەرلەو سەرکەوتنانەدا چەندی رێزلینان و سەرکەوتنی بەدەست هێناوە تا ئەو ڕادەیەی کە کارەکانی بوون بە پوول و لە ووڵاتی سوریادا چاپ کراون ، ئەو حەز لە گووڵ و سروشت دەکات ، مرۆڤیش حەزی لەو گولانەیە ، گوڵی ئەو تۆ و کەسانی ترن ، گووڵ پێکەنینە ، گوڵ جوانی جیهانی هەیە وە زمانێکی جیهانی یە بەتایبەت لە نەخشاندنی ئەو تابلۆیانەی کە پێوانەیەکی بێ سنووری هەیە ، ئەوەش لەکارەکانی هونەرمەند عبدالسلام عبداللە دا دەبینرێت .
عبدالسلام عبداللە .. ساڵی ١٩٨٥ کۆلیژی هونەرەجوانەکانی تەواو کردوە لە دیمەشق.
ئەندامی یەکێتی هونەرمەندانی سێوەکارانی سوریایە.
مامۆستای پەیمانگای ڕۆشنبیری هونەری شێوەکاری یە لە دیمەشق .
پێشانگاکان
١٩٧٣ سەنتەری ڕۆشنبیری عەرەبی لە قامشلی
١٩٩٧ هۆڵی سوری دیمەشق
١٩٩٨ هۆڵی سەید لە دیمەشق
٢٠٠٢ هۆڵی مولتەقا لە ڕیاز ، سعودیە
٢٠٠٣ هۆڵی فەنار لە کوەیت و پاریس و مەدرید و مونیکار لە ئیسپانیا.
٢٠١٠ هۆڵی شەعب لە دیمەشق . سوریا
