ئاشتی گەرمیانی .. هەولێر
شێوەکارێکی کورد لە ڕۆژهەڵاتی کوردستانەوە ، هونەرمەند یوسف سوری کە ماوەی ٢٥ ساڵە نیشتەجێ ی ووڵاتی نەرویژە و زۆربەی تەمەنی لە نێو هونەری شیوەکاری بەهەموو ئەزموونەکانەوە بەسەر بردوە ، وە خاوەن چەندین تابلۆو کاری هونەری یە ، گرنگی داوە بەهەموو قوتابخانە هونەرییەکان و توێژینەوە هونەریەکان ، تەمەنی ٥٩ ساڵە و لە نەرویژ دەژیت و ٤٠ ساڵە کاری هونەری شێوەکاری دەکات ، گرنگی داوە بە قوتابخانە ئەکادیمییەکان و کەلتووری کوردی و مەینەتیەکانی نەتەوەی کورد وە خۆشەویستی بۆ گەلەکەی .
دوا چالاکی هونەری هونەرمەند یوسف سوری ئەو پێشانگا تایبەتی یە بوو کە لە ئۆسلۆ بە نمایش کردنی ٥٠ تابلۆی جۆراو جۆر پێشانگاکە کرایەوە بەئامادە بوونی ڕەوەندی کوردی لە ووڵاتی نەرویژ ، ئەگەر دیدەیەك لەکارە هونەریەکانی هونەرمەند بگرین ئەوا زۆر دووربینی تێدا بەرجەستە دەکرێت ، چ لە ڕووی هونەری یەوە وە چ لە ڕووی فۆرم و ناوەڕوەك و تەکنیك و کارامەی هونەرمەندە وە ، قۆناغەکانی هونەری لەلای هونەرمەند زۆرن وە ڕیز بەندیان هەیە بەتایبەتی ئەو سروشتەی کەبە ڕیالیستی ناسراوە ، دەست بردن بۆ وێنەی سروشتی کوردستان ئەمە خاڵێکە کە گرنگی تایبەتی خۆی هەیە ، وە دەرخستەی بابەت و فۆرمەکانی کورد کە چی بەسەردا هاتووە ، لەلایەکی ترەوە وێنەی دەموو چاو پۆرترێتی کورد ، یان ئازارەکانی میللەتی کورد لەنێو تابلۆکانی هونەرمەندا ڕەنگ دانەوەی هەیە ، لەو فۆرم و بابەتانە هونەرمەند ڕێبازی ئەکادیمی و ڕێالیستی گرتۆتە بەر وە ئەزموونێکی پڕو چڕی لەو بوارەدا هەیە ، هەست کردن بە نەتەوەو خاك هونەرمەند ئەو فۆرمانە بەکار دەهێنێت کە زیندوو کەرەوەی نەتەوەکەیەتی .
لە بەکارهێنانی ماتریاڵەکان کەڤاڵ و ئەکریلیك یان ڕەنگی ڕۆنی و گواش و هێڵکاری کەرەستەی زیندووی کارە هونەریەکانێتی ، لەو دیدەیەوە هونەرمەند ساڵانە پێشانگاو هاوبەشی هەیە لە گەلەری و هۆڵ و ئەتەلییەکاندا .بەکار هێنانی کوردەواری ڕەسەن و دیمەنی جوانی کوردستان و ستیلایف و وێنەی چیاکان و دەرگاکان و کەلتووری کوردی بەتایبەتی مەشکە ژەنین و دەرگاو جل و پۆشاکی کوردی کە زۆریان ئێستا نەماون .
وەکو باسمان کرد وە بەڕێزیان دوباتیان کردۆتەوە کە قوتابخانەکانی ڕیالیستی وئابستراك و دەربڕین خوازی هەنگاوی قوتابخانە هونەریەکانە کە هونەرمەند یوسف سوری دەری بڕیوە لە نێو تابلۆکانیدا .
دەزگا هونەریەکانی نەرویج بەتایبەتی ئۆسلۆ هاوکاری هونەرمەندیان کردوە لە جێگا و گرنگی پێدانی ، وە ڕەندی کوردستانی لە ووڵاتی نەرویج ئامادەیی تەواوی هەبووە لە پێشانگاکەدا .
