ئاشتی گەرمیانی .. هۆڵەند
لە ڕۆژی ٧ / ٦ / ٢٠٢١ ڕۆژی دووشەمە لە شاری زەیتوون – هەولێری پایتەخت لەلایەن پارێزگاری هەولێر ( ئومێد خۆشناو ) وە بەڕێز ئەحمەد کانی بەرپرسی پەیوەندییەکان مۆزەخانەی ئاوێنە ی تایبەتی هونەرمەندی شێوەکاری کورد دارا محمد عەلی کرایەوە ، بۆ هەموو ڕۆشنبیران و نوسەران و گەشتیاران و خەڵکانی کوردستان ، بەئامادەبوونی کۆمەڵێك لە نوسەران و هونەرمەندان و ڕۆشنبیرانی کوردستانی ، کە کۆمەڵێك کاری تابلۆی گەورەو بچووك و پانۆڕاماو چیرۆك و بەسەرهات و ئاوێنە شکاوەکان و مۆنتیڤ و تابلۆ کەلتووریەکان و پاشماوەی زێدەی باو باپیران لەو مۆزەخانەیەدا نمایش کراون وە ڕۆژانە بینەران دەتوانن سەردانی بکەن .
پرۆژەی بە مۆزەخانە کردنی بەرهەم و کارە هونەریەکانی هونەرمەند دارا محمە عەلی لەسەر ئەرکی تایبەتی خۆی ئەنجامی داوە کە بریتین لە ماڵێکی پڕ لە شێوەکاری و ئەزموون و کارو چیرۆك و بەسەرهات و نمایشی هەموو لەو کارانە دەگرێتە خۆی کەلەماوەی ئەزموونی ژیانیدا ئەنجامیانی داوە .
ئەندامێتی مامۆستا دارا محمد عەلی:
ئەندامی سەندیکای هونەرمەندانی کوردستان ، کۆمەڵەی وێنەکێشانی عێراقی ، نەقابەی هونەرمەندانی عێراقی وکۆمەڵەی پەیکەرسازانی عێراقی و سەندیکای ڕۆژنامەنوسانی کوردستان و ئەندامی دەستەی دامەزرێنەری پەیمانگای هونەرە جوانەکانی شاری هەولێرو سەنتەری کاری دەستی هەولێر.
