پارتی دیموكراتی گەلان (ھەدەپە) ڕایدەگەیەنێت، زیاتر لە ھەزار و ٦٠٠ دەستگیركراوی سیاسی لە زیندانەكانی توركیا ژیانیان لە مەترسیدایە.
پارتی دیموكراتی گەلان (ھەدەپە) ڕایگەیاند، ھەزار و ٦٠٥ دەستگیركراوی سیاسی و ئەندامی ھێزەكانی ئۆپۆزسیۆن، لە زیندانەكانی توركیا بەھۆی تووشبوونیان بە نەخۆشی درێژخایەن و كوشندەوە ژیانیان لە مەترسیدایە، كە لەو ژمارەیە ٦٠٤ زیندانییان باری تەندروستیان زۆر خراپە و پێویستیان بە چاودێری وردی پزیشكی ھەیە.
ھەدەپە داوای لە پەرلەمانی توركیا كردووە پڕۆژەیەك گەلاڵە بكات، بۆ دەركردنی بڕیاری لێبوردن، بۆ ئەو زیندانیانەی گیرۆدەی نەخۆشی كوشندە بوون.
بەپێی ئامارێكی ڕێكخراوە نێودەوڵەتییەكانی مافی مرۆڤیش، لە ئێستادا زیندانەكانی توركیا زیاتر لە ٢٦٠ ھەزار بەندكراوی تێدایە، كە لە زۆری ژمارەی بەندكراوان ئەو وڵاتە لەسەر ئاستی جیهان لە پلەی دووەمدایە.
